اقتوبە وبلىسىنىڭ ويىل اۋدانىنداعى ۋاقىتشا وتكەلدى قارعىن سۋ شايىپ كەتتى. قازىرگى ۋاقىتتا وتكەلدى قالپىنا كەلتىرۋ جۇمىستارى ءجۇرىپ جاتىر، دەپ حابارلايدى "ادىرنا" ۇلتتىق پورتالى.
بىلتىر كوكتەمگى سۋ تاسقىنى كەزىندە ويىلعا كىرەبەرىس نەگىزگى كوپىر بۇزىلىپ، ۋاقىتشا وتكەل سالىنعان ەدى. الايدا قار سۋىنىڭ كوتەرىلۋىنە بايلانىستى وتكەلدى سۋ باستى.
ويىل اۋدانى اكىمدىگىنىڭ مالىمەتىنشە، وتكەلدى جوندەۋ جۇمىستارى جۇرگىزىلۋدە. ءبىر تاۋلىكتىڭ ىشىندە كولىك قوزعالىسى قايتا جاندانۋى ءتيىس. قازىرگى ۋاقىتتا تۇرعىنداردىڭ وزەن ارقىلى وتۋىنە جاعداي جاسالىپ جاتىر.
ويىل اۋدانىنىڭ اكىمى اسقار قازىباەۆ وزەن دەڭگەيىنىڭ كوتەرىلگەنىن راستادى.
ەسكە سالا كەتەيىك، اقتوبە وبلىسىندا سۋ شايعان كوپىرلەر مەن جولداردى جوندەۋگە 15 ملرد تەڭگەدەن استام قاراجات قاجەت. ونىڭ ىشىندە ويىل اۋدانىنا كىرەبەرىس نەگىزگى كوپىردى قالپىنا كەلتىرۋگە 4 ملرد تەڭگەگە جۋىق قارجى بولىنبەك.
