اباي وبلىسىندا "قازاۆتوجول" ۇلتتىق كومپانياسىنىڭ ماماندارى ءتۇنى بويى قار قۇرساۋىندا قالعان جۇرگىزۋشىلەردى قۇتقارۋ جۇمىستارىن جۇرگىزدى. 60-تان استام اۆتوكولىك قاردان شىعارىلعانىمەن، جولدا قالعاندار ءالى دە كوپ، دەپ حابارلايدى "ادىرنا" ۇلتتىق پورتالى.
بوراننان جول جابىلدى
12 ناۋرىز كۇنى ساعات 23:00-دە "الماتى – تالدىقورعان – وسكەمەن" تاسجولىنىڭ تاسكەسكەن اۋىلىنا بۇرىلىس پەن اياگوز قالاسى ارالىعىندا جۇك كولىكتەرى ءۇشىن جول جابىلعان. كەيىننەن بوران كۇشەيىپ، جەڭىل كولىكتەردىڭ قوزعالىسىنا دا شەكتەۋ قويىلدى. الايدا، 100-دەن استام كولىك جولعا شىعىپ ۇلگەرىپ، قار قۇرساۋىندا قالدى.
قۇتقارۋ جۇمىستارى جۇرگىزىلۋدە
"قازاۆتوجول" كومپانياسىنىڭ 20-عا جۋىق ارنايى تەحنيكاسى قار تازالاۋ جۇمىستارىن جالعاستىرۋدا. بىراق بوران كۇشەيىپ، جولدى تازالاۋعا كەدەرگى كەلتىرۋدە. جولدا قالعان 3 جولاۋشى اۆتوبۋسى اياگوزگە جەتكىزىلىپ، 77 ادام (ونىڭ ىشىندە 3 بالا) جىلىتۋ پۋنكتىنە ورنالاستىرىلدى.
تاسكەسكەن – اياگوز باعىتى ءالى جابىق
قازىرگى ۋاقىتتا تاسكەسكەن جاعىندا – 90 جۇك كولىگى، 40 جەڭىل كولىك جانە 4 اۆتوبۋس جولدىڭ اشىلۋىن كۇتىپ تۇر. اياگوز جاعىندا – 120-دان استام كولىك جولدىڭ اشىلۋىن توسۋدا.
ماماندار ەسكەرتۋ جاسايدى
كوكتەم باستالعانىمەن، قىس ءالى دە ءوز مىنەزىن كورسەتۋدە. وسىعان بايلانىستى ماماندار جۇرگىزۋشىلەرگە جولعا شىقپاس بۇرىن 1403 بايلانىس ورتالىعىنا حابارلاسىپ، جولدىڭ اشىقتىعى تۋرالى اقپارات الۋعا كەڭەس بەرەدى.
