بۇگىن «ۇلان» بالالار مەن جاسوسپىرىمدەر گازەتىنىڭ نەگىزى قالانعانىنا 95 جىل تولدى.
باسىلىم العاش رەت «جاس الاش» گازەتىنىڭ 5-6 بەتىن قامتيتىن ىشكى گازەت رەتىندە جاريالاندى. گازەت قازاق بالالارىن باستاۋىش جانە تولىق ەمەس ورتا ءبىلىم الۋعا شاقىردى.
گازەت 1930-1937 جىلدارى «پيونەر»، 1937-1941 جىلدارى «وكتيابر بالالارى» دەگەن اتاۋمەن باسىلىپ شىقتى. ۇلى وتان سوعىسى جىلدارى باسىلمادى. 1946-1989 جىلدارى گازەتتىڭ اتاۋى «قازاقستان پيونەرى» بولىپ وزگەردى.
1930 جىلى 5 قاراشادا «پيونەر» گازەتى الماتى قالاسىنىڭ گوگول كوشەسىندەگى № 9 ۇيدە تۇڭعىش رەت ءوز الدىنا دەربەس باسىلىم بولىپ شىقتى. گازەتتىڭ قۇرىلۋىنا جازۋشىلار مەن قوعام قايراتكەرلەرى: س. سەيفۋللين، ب. مايلين، ءى. جانسۇگىروۆ، ع. مۇسىرەپوۆ، س. ەسوۆا، م. اۋەزوۆ، س. مۇقانوۆ، س. بەگالين، ب. سوقپاقباەۆ اتسالىستى.
سوعىستان كەيىنگى جىلدارى گازەت بالالاردىڭ كۇش جىگەرىن ەرەسەكتەرگە اۋىلشارۋاشىلىق ەكونوميكانى كوتەرۋگە، مال شارۋاشىلىعى مەن ەگىنشىلىكتى دامىتۋعا كومەكتەسۋگە باعىتتادى. تىڭ جانە تىڭايعان جەرلەردى يگەرۋ كەزىندە گازەت «تىڭ جەرلەردەن حات»، «بۇل پيونەرلەردىڭ كومەگى» دەگەن تۇراقتى تاقىرىپتارمەن ماتەريالدار شىعاردى. گازەت سونىمەن قاتار ءوز وقىرماندارىن عىلىم جانە تەحنيكا، ادەبيەت پەن ونەر، مادەنيەت جانە سپورت جاڭالىقتارىمەن تانىستىردى. سول كەزدەگى گازەتتىڭ باستى ايدارلارى: «عالامشاردىڭ جاس باتىرلارى»، «مولشىلىق»، «ءتورتىنشى، بەسىنشى ەڭبەك»، «جولداس ۆوجاتىي» جانە ت.ب.
ءار جىلدارى باسىلىم رەداكتورلارى ءا. يسمايىلوۆ، ءا. ىدىرىسوۆ، س. بەردىقۇلوۆ، ف. وڭعارسىنوۆا، ۋ. قاليجان، ب. قويشىباەۆ، ع. دوسكەن، ب. سۇلەيمەنوۆ، س. قاليۇلى جانە ت.ب. بولدى.
قازاقستان تاۋەلسىزدىگىنىڭ العاشقى جىلدارىنان باستاپ گازەتكە زاماناۋي «ۇلان» اتاۋى بەرىلدى.
1980 جىلى جارىق كورگەنىنە 50 جىل تولۋىنا وراي جانە جاس ۇرپاققا سانالى تاربيە بەرۋ جولىنداعى ەڭبەگى ەسكەرىلىپ، «قازاقستان پيونەرى» گازەتى «قۇرمەت» وردەنىمەن ماراپاتتالدى.
«ۇلان» گازەتى 2002 جىلى قازاقستان رەسپۋبليكاسى جۋرناليستيكا اكادەمياسىنىڭ «التىن جۇلدىز» سىيلىعىن «بالالار باسىلىمى» نوميناتسياسى بويىنشا يەلەندى.
كورمەگە قازاقستان رەسپۋبليكاسىنىڭ ۇلتتىق كىتاپحاناسى قورىنان الىنعان بالالار جازۋشىلارى مەن جۋرناليستەردىڭ ءار جىلدارداعى، گازەتتەر مەن جۋرنالدار بەتتەرىندەگى ماقالالار قويىلدى.
