قازاق حالقىنىڭ ەجەلگى سالت-ءداستۇرى بويىنشا ەلىمىزدىڭ باتىس وڭىرلەرىندە ناۋرىز مەيرامىن اتاپ ءوتۋ – 14 ناۋرىز كورىسۋ كۇنى مەرەكەسىمەن باستالادى.
وسى ورايدا باتىس قازاقستان وبلىسىنىڭ اكىمى ناريمان تورەعاليەۆ كورىسۋ كۇنى ورالداعى اجعاليەۆتەر اۋلەتىنە باردى. اجعاليەۆتەر – وڭىردەگى كوپكە ۇلگى وتباسىلاردىڭ ءبىرى. اۋلەتتىڭ بالارىنىڭ كوپشىلىگى مەديتسينا سالاسىندا ۇزاق جىلدار ەڭبەك ەتىپ، وبلىستىڭ دەنساۋلىق ساقتاۋ سالاسىنىڭ دامۋ تاريحىندا ەلەۋلى ءىز قالدىردى.
بقو اكىمى اجعاليەۆتەر وتباسىن بۇگىنگى مەرەكەمەن قۇتتىقتادى.
«ۇلكەنگە - قۇرمەت، كىشىگە - ىزەت» - دەيدى دانا حالقىمىز. كورىسۋ كۇنى سىزدەردىڭ اۋلەتىڭىزگە ارنايى كەلىپ وتىرمىن. بۇل مەيرام ءبىزدىڭ ۇلتتىق قۇندىلىقتارىمىزدى نىعايتۋعا سەپتىگىن تيگىزەدى. سىزدەردىڭ وتباسىلارىڭىز مەديتسينا سالاسىنداعى كوپ جىلعى ەڭبەگىمەن ەلدىڭ دامۋىنا زور ۇلەس قوسىپ كەلەدى. بۇل ەڭبەككە ادالدىقتىڭ جانە ماقساتقا بەرىكتىكتىڭ بەلگىسى. وتباسىلارىڭىزعا زور دەنساۋلىق، باق-بەرەكە، بالا-شاعاڭىزعا اماندىق تىلەيمىن»- دەدى ءوڭىر باسشىسى ناريمان تورەعاليەۆ.
ناريمان تورەعاليەۆ وبلىس تۇرعىندارىن ناۋرىز مەرەكەسىنىڭ باستالۋىمەن قۇتتىقتادى.
«Cىزدەردى كورىسۋ كۇنىمەن، امال مەرەكەسىمەن قۇتتىقتايمىن! بۇرىندا اتا-بابالارىمىز ءدال وسى كۇنى ءبىر-بىرىمەن قۋانا قاۋىشىپ، اماندىق-ساۋلىق سۇراسىپ، ىزگى تىلەكتەرىن ارناعانى بەلگىلى. مەملەكەت باسشىسى قاسىم-جومارت كەمەلۇلى توقاەۆ اتاپ وتكەندەي، ەلدىك پەن ىنتىماققا شاقىراتىن وسى مەيرام — ۇلتىمىزدىڭ باۋىرمالدىق سالتىنىڭ جارقىن كورىنىسى. وتكەن جىلى قر پرەزيدەنتىنىڭ تاپسىرماسىنا سايكەس ەلىمىزدە ناۋرىزناما تۇجىرىمداماسى بەكىتىلگەنى بەلگىلى. ۇلتتىق قۇندىلىقتارىمىز بەن داستۇرلەرىمىزدى جاڭعىرتۋعا باعىتتالعان وسى تۇجىرىمداما نەگىزىندە ۇلىستىڭ ۇلى كۇنى — ناۋرىز مەيرامى ەلىمىزدە 14 ناۋرىزدان باستاپ تويلانادى. جانە ول ون كۇندىك كورىسۋ كۇنىنەن باستاۋ الاتىنى ءبىز ءۇشىن ۇلكەن قۋانىش»- دەدى ءوڭىر باسشىسى.
باتىس قازاقستان وبلىسىندا كورىسۋ كۇنى مەيرامى كەڭ كولەمدە اتالىپ ءوتىلدى. وبلىستىڭ ءار اۋدانىندا ءتۇرلى تانىمدىق
ءىس-شارالار ءوتتى.
