دۋشانبەدەن كەلگەن العاشقى رەيستى بىشكەك قۇتتى قادام تىلەپ، سۋدان شاشۋ شاشىپ قارسى الدى، دەپ حابارلايدى “ادىرنا” ۇلتتىق پورتالى.
كەشە، 13 ناۋرىزدا قىرعىزستان پرەزيدەنتى سادىر جاپاروۆ پەن تاجىكستان باسشىسى ەمومالي راحمون ەكى ەل اراسىنداعى مەملەكەتتىك شەكارانىڭ دەليميتاتسياسى مەن دەماركاتسياسى تۋرالى كەلىسىمگە قول قويعان ەدى.
ال بۇگىن بىشكەككە دۋشانبەدەن العاشقى ۇشاق ۇشىپ كەلدى. قىرعىزستان وعان قۇتتى قادام تىلەپ، سۋدان شاشۋ شاشىپ، قارسى الدى.
رەسمي مالىمەتكە سايكەس، مەملەكەت باسشىلارى شەكارا قىزمەتىنىڭ باسشىلارىنا ەكى ەل اراسىنداعى شەكارا بەكەتتەرىن قايتا اشۋعا رۇقسات بەردى. وسىلايشا، «قايراگاچ» (لەيلەك اۋدانى) جانە «قىزىل-بەل» (باتكەن اۋدانى) وتكىزۋ بەكەتتەرى قايتا جۇمىس ىستەي باستايدى. اتالعان بەكەتتەر ءتورت جىلعا جۋىق ۋاقىت جابىق بولعان ەدى.
بۇعان دەيىن، 21 اقپاندا قىرعىزستان مەن تاجىكستان ۇكىمەتتىك دەلەگاتسيالارى شەكارا ماسەلەسىنە قاتىستى قورىتىندى حاتتاماعا قول قويعان بولاتىن. ال 27 اقپاندا قىرعىزستان پارلامەنتىنىڭ بىرنەشە كوميتەتى كەلىسىمدى ماقۇلدادى.
ايتا كەتەيىك، قىرعىزستان مەن تاجىكستان اراسىنداعى شەكارا ۇزىندىعى 972 كم. الايدا، باتكەن وبلىسىنداعى شەكارا سىزىعىنىڭ بەلگىسىزدىگى ەكى ەل اراسىندا قايشىلىقتار تۋعىزعان. سوڭعى ءىرى قاقتىعىس 2022 جىلدىڭ 14-17 قىركۇيەگى ارالىعىندا ورىن الىپ، ەكى تاراپتان جۇزدەن استام ادام قازا تاپقان ەدى.
