2024 جىلى جازدا الاكولدە اپاتقا ۇشىراعان "SKYPPER 912" دەلتاپلانىنىڭ يەسىنە ايىپپۇل سالىندى جانە ۇشۋ اپپاراتى مەملەكەت پايداسىنا تاركىلەندى، دەپ حابارلايدى "ادىرنا" ۇلتتىق پورتالى Tengrinews.kz-كە سىلتەمە جاساپ.
"دوستىق" كولىك پروكۋراتۋراسى دەلتاپلان يەسىنىڭ ارەكەتىنەن قۇقىق بۇزۋشىلىقتاردى انىقتادى. ول ءتيىستى رۇقساتسىز دەمالۋشىلارعا الاكول ۇستىندە اقىلى ۇشۋدى ۇسىنعان. پروكۋراتۋرا باستاماسىمەن بۇل ءىس الماتى قالاسىنىڭ اكىمشىلىك قۇقىق بۇزۋشىلىقتار بويىنشا مامانداندىرىلعان اۋدانارالىق سوتىندا قارالدى، – دەلىنگەن باس پروكۋراتۋرانىڭ رەسمي مالىمدەمەسىندە.
سوت شەشىمى بويىنشا، دەلتاپلان يەسى قازاقستان رەسپۋبليكاسىنىڭ اۋە كەڭىستىگىن پايدالانۋ ءتارتىبىن بۇزعانى ءۇشىن اكىمشىلىك قۇقىق بۇزۋشىلىقتار تۋرالى كودەكستىڭ 563-بابىنىڭ 2-بولىگىمەن كىنالى دەپ تانىلىپ، وعان 55 380 تەڭگە ايىپپۇل سالىندى. سونىمەن قاتار، ۇشۋ اپپاراتى مەملەكەت مەنشىگىنە الىندى.
2024 جىلدىڭ جازىندا الاكولدە "SKYPPER 912" دەلتاپلانى اپاتقا ۇشىراپ، سالدارىنان ەكى ادام زارداپ شەككەن بولاتىن. بۇل وقيعا بويىنشا قازاقستان رەسپۋبليكاسى قىلمىستىق كودەكسىنىڭ 344-بابىنىڭ 1-بولىگىمەن قىلمىستىق ءىس قوزعالعان ەدى. الايدا تاراپتاردىڭ تاتۋلاسۋىنا بايلانىستى ءىس توقتاتىلدى.
