13 ناۋرىزدان باستاپ اكىمشىلىك كودەكسكە ەنگىزىلگەن تۇزەتۋلەر كۇشىنە ەندى. جۇرگىزۋشىلەر مەن جولاۋشىلارعا قاتىستى بىرنەشە جاڭا تالاپتار ەنگىزىلىپ، كەيبىر ايىپپۇل مولشەرى ارتتى، دەپ حابارلايدى “ادىرنا” ۇلتتىق پورتالى.
كولىكتىڭ سىرتىندا وتىرۋعا جانە تەرەزەدەن باس شىعارىپ جۇرۋگە تىيىم سالىندى. سونداي-اق، ءجۇرىپ كەلە جاتقان كولىكتىڭ تەرەزەسىنەن نەمەسە ليۋگىنەن باسىن شىعارۋ، كولىك ەسىگىن اشۋ، سونداي-اق جولاۋشىلاردى كولىك سالونىنان تىس تاسىمالداۋ ءۇشىن 10 اەك (38 610 تەڭگە) ايىپپۇل سالىنادى. بۇل تالاپ مەكتەپ بىتىرۋشىلەردىڭ تويلاۋ كورتەجدەرى مەن باسقا دا سالتاناتتى شارالارعا قاتىستى.
ارنايى قىزمەت كولىكتەرىنە جول بەرمەۋ ءۇشىن ايىپپۇل ەكى ەسە كوبەيدى.
بۇرىن جەدەل جاردەم نەمەسە ءورت ءسوندىرۋ كولىگىنە جول بەرمەگەندەر 7 اەك تولەسە، ەندى 20 اەك (77 220 تەڭگە) ايىپپۇل تولەيدى. ءبىر جىل ىشىندە بۇل ەرەجەنى قايتا بۇزعان جاعدايدا، ايىپپۇل 40 اەك (154 440 تەڭگە) بولادى.
جۇرگىزۋشىنىڭ قارسيا باعىتقا شىققانى ءۇشىن ايىپپۇل كۇشەيتىلدى.
مۇگەدەكتىگى بار جۇرگىزۋشىلەر قارسى جولاققا شىقسا، 30 اەك (115 830 تەڭگە) كولەمىندە ايىپپۇل تولەيدى. قارسى باعىتقا شىعىپ، جول اپاتىنا سەبەپشى بولسا، جۇرگىزۋشى كۋالىگىنەن 9 ايعا ايىرىلادى.
تەمىرجول وتكەلدەرىنەن ءوتۋ ەرەجەلەرى قاتاڭداتىلدى. تەمىرجول وتكەلىنە بەلگىگە قاراماستان ءوتۋ ايىپپۇلى ەكى ەسە ءوستى.
باعدارشامنىڭ تىيىم سالاتىن بەلگىسىنە نەمەسە شلاگباۋم جابىلىپ جاتقاندا وتكەلدەن وتكەندەر ەندى 20 اەك (77 220 تەڭگە) ايىپپۇل تولەيدى. بۇرىن 10 اەك بولعان.
ەگەر بۇل ەرەجە بۇزىلىپ، جولعا، كولىككە نەمەسە باسقا مۇلىككە زاقىم كەلسە، جۇرگىزۋشى 9 ايعا كۋالىگىنەن ايىرىلادى.
اۆتوتۇراق اقىسىن تولەمەگەندەر ءۇشىن ايىپپۇل تومەندەتىلدى. بۇرىن 3 اەك بولسا، ەندى 1 اەك (3 861 تەڭگە). ءبىر جىل ىشىندە بۇل ەرەجەنى قايتالاپ بۇزعان جاعدايدا، ايىپپۇل 2 اەك (7 722 تەڭگە) بولادى.
جول اپاتىنان زارداپ شەككەندەر بولماعان جاعدايدا ايىپپۇل 15-تەن 20 اەك-كە ءوستى.
ەگەر جۇرگىزۋشى ءبىر جىل ىشىندە قايتادان جول اپاتىنا تۇسسە نەمەسە كىسى زارداپ شەكسە، ول 9 ايعا جۇرگىزۋشى كۋالىگىنەن ايىرىلادى. بۇرىن بۇل مەرزىم 1 جىل بولاتىن.
1 قىركۇيەكتەن باستاپ قازاقستاندا جاڭا جازا ءتۇرى — قوعامدىق جۇمىستار قولدانىلادى. بۇل جازا جول ەرەجەسىن بۇزعان جۇرگىزۋشىلەر مەن جاياۋ جۇرگىنشىلەرگە تاعايىندالۋى مۇمكىن.
جاڭا تۇزەتۋلەر جول قوزعالىسى قاۋىپسىزدىگىن كۇشەيتۋ جانە ءتارتىپ بۇزۋشىلىقتاردىڭ الدىن الۋ ماقساتىندا ەنگىزىلگەن.
