13 naýryzdan bastap Ákimshilik kodekske engizilgen túzetýler kúshine endi. Júrgizýshiler men jolaýshylarǵa qatysty birneshe jańa talaptar engizilip, keıbir aıyppul mólsheri artty, dep habarlaıdy “Adyrna” ulttyq portaly.
Kóliktiń syrtynda otyrýǵa jáne terezeden bas shyǵaryp júrýge tyıym salyndy. Sondaı-aq, júrip kele jatqan kóliktiń terezesinen nemese lıýginen basyn shyǵarý, kólik esigin ashý, sondaı-aq jolaýshylardy kólik salonynan tys tasymaldaý úshin 10 AEK (38 610 teńge) aıyppul salynady. Bul talap mektep bitirýshilerdiń toılaý kortejderi men basqa da saltanatty sharalarǵa qatysty.
Arnaıy qyzmet kólikterine jol bermeý úshin aıyppul eki ese kóbeıdi.
Buryn jedel járdem nemese órt sóndirý kóligine jol bermegender 7 AEK tólese, endi 20 AEK (77 220 teńge) aıyppul tóleıdi. Bir jyl ishinde bul erejeni qaıta buzǵan jaǵdaıda, aıyppul 40 AEK (154 440 teńge) bolady.
Júrgizýshiniń qarsıa baǵytqa shyqqany úshin aıyppul kúsheıtildi.
Múgedektigi bar júrgizýshiler qarsy jolaqqa shyqsa, 30 AEK (115 830 teńge) kóleminde aıyppul tóleıdi. Qarsy baǵytqa shyǵyp, jol apatyna sebepshi bolsa, júrgizýshi kýáliginen 9 aıǵa aıyrylady.
Temirjol ótkelderinen ótý erejeleri qatańdatyldy. Temirjol ótkeline belgige qaramastan ótý aıyppuly eki ese ósti.
Baǵdarshamnyń tyıym salatyn belgisine nemese shlagbaým jabylyp jatqanda ótkelden ótkender endi 20 AEK (77 220 teńge) aıyppul tóleıdi. Buryn 10 AEK bolǵan.
Eger bul ereje buzylyp, jolǵa, kólikke nemese basqa múlikke zaqym kelse, júrgizýshi 9 aıǵa kýáliginen aıyrylady.
Avtoturaq aqysyn tólemegender úshin aıyppul tómendetildi. Buryn 3 AEK bolsa, endi 1 AEK (3 861 teńge). Bir jyl ishinde bul erejeni qaıtalap buzǵan jaǵdaıda, aıyppul 2 AEK (7 722 teńge) bolady.
Jol apatynan zardap shekkender bolmaǵan jaǵdaıda aıyppul 15-ten 20 AEK-ke ósti.
Eger júrgizýshi bir jyl ishinde qaıtadan jol apatyna tússe nemese kisi zardap shekse, ol 9 aıǵa júrgizýshi kýáliginen aıyrylady. Buryn bul merzim 1 jyl bolatyn.
1 qyrkúıekten bastap Qazaqstanda jańa jaza túri — qoǵamdyq jumystar qoldanylady. Bul jaza jol erejesin buzǵan júrgizýshiler men jaıaý júrginshilerge taǵaıyndalýy múmkin.
Jańa túzetýler jol qozǵalysy qaýipsizdigin kúsheıtý jáne tártip buzýshylyqtardyń aldyn alý maqsatynda engizilgen.
