وزبەكستاندىق مودەل سابرينا جاببوروۆا ءانشى وزودا نۇرسايدوۆانىڭ “ديلباريم” بەينەبايانىنىڭ ءتۇسىرىلىمى كەزىندە اۋىر جول اپاتىنا ۇشىرادى، دەپ حابارلايدى “ادىرنا” ۇلتتىق پورتالى Stan.kz-كە سىلتەپ.
Mercedes G-Class كولىگى ونى قاعىپ، بىرنەشە جەرىنەن اۋىر جاراقات العان.
وقيعا 2024 جىلدىڭ 7 قاراشاسىندا بولعان. رەجيسسەر شۋحرات ماۆلونوۆتىڭ نۇسقاۋىمەن كامەلەتكە تولماعان اكتريسا سەۆينچ مارۋفوۆا كولىكتى جۇرگىزۋگە تىرىسقان. الايدا كولىكتى باسقارا الماي، سابرينا جاببوروۆانى قاعىپ كەتكەن. كولىك دوڭگەلەگى ونىڭ ۇستىنەن ەكى رەت وتكەن. الدىمەن الدىڭعى دوڭگەلەك، كەيىن ارتقى دوڭگەلەك كەرى ءجۇرىپ باسىپ وتكەن.
اپات سالدارىنان مودەلدىڭ جامباس سۇيەگى سىنعان، جاتىرى مەن قۋىعى زاقىمدانعان. وقيعا ورنىندا وعان ءبىر ساعات بويى العاشقى مەديتسينالىق كومەك كورسەتىلمەگەندىكتەن، ءۇش ليتر قان جوعالتقان. وتا توعىز ساعاتقا سوزىلىپ، دارىگەرلەر ونىڭ ءومىرىن ساقتاپ قالدى. الايدا جامباستىڭ دۇرىس ورنىقپاۋىنان سول اياعى وڭ اياعىنان 7 سم ۇزارىپ، سابرينا مۇگەدەك بولىپ قالدى.
بۇل وقيعا بويىنشا سوتقا دەيىنگى تەرگەۋ اياقتالىپ، ءىس سوتقا جولداندى. سابرينا جاببوروۆا قايتا ءجۇرىپ كەتۋ ءۇشىن شەتەلدە كۇردەلى وتا جاساتۋى قاجەت ەكەنى تۋرالى اقپارات تارادى.
