تۇركىستان وبلىسى ءبىلىم باسقارماسى سارىاعاش مەدرەسەسىنىڭ باس ۇستازى ءابدۋجاپپار سمانوۆتىڭ شاكىرتتەرى ونىڭ اياعىن ۋقالاپ جاتقانى تۇسىرىلگەن ۆيدەوعا قاتىستى تۇسىنىكتەمە بەردى، دەپ حابارلايدى "ادىرنا" ۇلتتىق پورتالى.
باسقارما وكىلدەرىنىڭ مالىمەتىنشە، وقيعاعا قاتىستى تەكسەرۋ جۇمىستارى جۇرگىزىلگەن. ناتيجەسىندە ۆيدەودا ۇستازدىڭ شاكىرتتەرى ەمەس، ءوز نەمەرەلەرى مەن جيەنى ەكەنى انىقتالعان.
"ساتىبالدى ءابىشۇلى اتىنداعى سارىاعاش مەدرەسەسىندە تاڭ نامازىنان كەيىن ستۋدەنتتەرگە ايتقان ۋاعىز-ناسيحات بارىسىندا مەدرەسەنىڭ باس ۇستازى ءابدۋجاپپار سمانوۆتىڭ اياعىن جاتتىعۋ جاساپ وتىرعان شاكىرتتەرى ەمەس، ءوز نەمەرەلەرى مەن جيەنى ۋقالاعان. ولار اتاسىنا قۇرمەت كورسەتىپ، باتاسىن الۋ ماقساتىندا وسىلاي ءىلتيپات بىلدىرگەن", – دەلىنگەن باسقارما مالىمدەمەسىندە.
جەلىدە تاراعان ۆيدەو قوعامدا قىزۋ تالقىلاندى. جۋرناليست وراز الىمبەك Facebook پاراقشاسىندا بۇل جاعدايعا نارازىلىق ءبىلدىرىپ، مينيسترلىككە ساۋال جولدادى.
"بۇل – ساتىبالدى ءابىشۇلى اتىنداعى سارىاعاش مەدرەسەسىنىڭ شاكىرتتەرى. مەدرەسەنىڭ باس ۇستازى ءابدۋجاپپار سمانوۆ ولارعا اياعىن ۋقالاتىپ قويىپتى. سوندا وقۋ-اعارتۋ مينيسترلىگى مەدرەسە شاكىرتتەرىنە سمانوۆتىڭ اياعىن ۋقالاسىن دەپ بيۋدجەتتەن جۇزدەگەن ميلليونداپ اقشا بولە مە؟ ەگەر بۇل ارەكەتكە توقتاۋ بولماسا، ەرتەڭ تابانىن جالاتىپ، باس بارماعىن سوردىرادى عوي", – دەپ جازدى جۋرناليست.
وقيعاعا قاتىستى باس ۇستازدىڭ تۋىستارى دا ءوز پىكىرىن ءبىلدىردى. ولار بۇل ارەكەتتىڭ ەش ابەستىگى جوق ەكەنىن ايتىپ، ۆيدەوداعى بالالاردىڭ شاكىرتتەر ەمەس، ۇستازدىڭ ءوز نەمەرەلەرى ەكەنىن مالىمدەدى.
