Túrkistan oblysy bilim basqarmasy Saryaǵash medresesiniń bas ustazy Ábdýjappar Smanovtyń shákirtteri onyń aıaǵyn ýqalap jatqany túsirilgen vıdeoǵa qatysty túsinikteme berdi, dep habarlaıdy "Adyrna" ulttyq portaly.
Basqarma ókilderiniń málimetinshe, oqıǵaǵa qatysty tekserý jumystary júrgizilgen. Nátıjesinde vıdeoda ustazdyń shákirtteri emes, óz nemereleri men jıeni ekeni anyqtalǵan.
"Satybaldy Ábishuly atyndaǵy Saryaǵash medresesinde tań namazynan keıin stýdentterge aıtqan ýaǵyz-nasıhat barysynda medreseniń bas ustazy Ábdýjappar Smanovtyń aıaǵyn jattyǵý jasap otyrǵan shákirtteri emes, óz nemereleri men jıeni ýqalaǵan. Olar atasyna qurmet kórsetip, batasyn alý maqsatynda osylaı iltıpat bildirgen", – delingen basqarma málimdemesinde.
Jelide taraǵan vıdeo qoǵamda qyzý talqylandy. Jýrnalıst Oraz Álimbek Facebook paraqshasynda bul jaǵdaıǵa narazylyq bildirip, mınıstrlikke saýal joldady.
"Bul – Satybaldy Ábishuly atyndaǵy Saryaǵash medresesiniń shákirtteri. Medreseniń bas ustazy Ábdýjappar Smanov olarǵa aıaǵyn ýqalatyp qoıypty. Sonda oqý-aǵartý mınıstrligi medrese shákirtterine Smanovtyń aıaǵyn ýqalasyn dep bıýdjetten júzdegen mıllıondap aqsha bóle me? Eger bul áreketke toqtaý bolmasa, erteń tabanyn jalatyp, bas barmaǵyn sordyrady ǵoı", – dep jazdy jýrnalıst.
Oqıǵaǵa qatysty bas ustazdyń týystary da óz pikirin bildirdi. Olar bul árekettiń esh ábestigi joq ekenin aıtyp, vıdeodaǵy balalardyń shákirtter emes, ustazdyń óz nemereleri ekenin málimdedi.
