12 ناۋرىز كۇنى رەسەي پرەزيدەنتىنىڭ ءباسپاسوز حاتشىسى دميتري پەسكوۆ اقش پەن ۋكراينانىڭ دجيدداداعى كەلىسسوزدەرىندە ۇسىنىلعان باستامالار ماسكەۋدە زەرتتەلىپ جاتقانىن مالىمدەدى، دەپ حابارلايدى "ادىرنا" ۇلتتىق پورتالى DW-گە سىلتەمە جاساپ.
ونىڭ ايتۋىنشا، رەسەي تاراپى اقش مەملەكەتتىك حاتشىسى ماركو رۋبيو مەن ۇلتتىق قاۋىپسىزدىك جونىندەگى كومەكشى مايك ۋولتتستىڭ الداعى كۇندەرى ماسكەۋگە كەلىسسوزدەر تۋرالى اقپارات بەرۋىن كۇتەدى. سونىمەن قاتار، پەسكوۆ رەسەي مەن اقش اراسىندا جوعارى دەڭگەيدەگى تەلەفون ارقىلى كەلىسسوزدەر بولۋى مۇمكىن ەكەنىن جوققا شىعارمادى.
رەسەي فەدەراتسيا كەڭەسى سوعىستى اياقتاۋعا قاتىستى كەز كەلگەن كەلىسىم اقش ەمەس، رەسەي تالاپتارىنا ساي جاسالۋى كەرەك دەپ مالىمدەدى. فەدەراتسيا كەڭەسى توراعاسىنىڭ ورىنباسارى كونستانتين كوساچەۆتىڭ ايتۋىنشا، ۋكراينا اقش ايتقان ۇسىنىستاردى قابىلداپ، ولارمەن كەلىسۋگە ءماجبۇر. ول رەسەيدىڭ جاعدايى باسقاشا ەكەنىن جانە كەلىسسوزدەردىڭ نەگىزگى شارتتارى مايدان دالاسىندا انىقتالاتىنىن اتاپ ءوتتى.
Reuters اگەنتتىگىنىڭ رەسەيدەگى دەرەككوزدەرىنە سۇيەنسەك، پرەزيدەنت ۆلاديمير پۋتين اقش ۇسىنعان 30 كۇندىك اتىستى توقتاتۋ باستاماسىن ناقتى كەپىلدىكتەرسىز قابىلداۋى ەكىتالاي. رەسەيلىك ساراپشىلاردىڭ پىكىرىنشە، سوعىستاعى قازىرگى جاعداي رەسەي ءۇشىن ءتيىمدى، ال ءبىتىم ۇسىنىسى قاقپان بولۋى مۇمكىن.
ۋكراينا پرەزيدەنت كەڭسەسىنىڭ باسشىسى اندرەي ەرماك 30 كۇندىك ۋاقىتشا ءبىتىم ماسەلەسى 17-23 ناۋرىز ارالىعىندا تالقىلانۋى مۇمكىن ەكەنىن حابارلادى. ونىڭ ايتۋىنشا، تەحنيكالىق ساراپشىلار دەڭگەيىندە كەلىسسوزدەردىڭ ەگجەي-تەگجەيى پىسىقتالادى.
ەرماك اقش-تىڭ رەسەيمەن دجيدداداعى كەلىسسوزدەر نەگىزىندە ۇسىنىستاردى تالقىلاۋى قاجەت ەكەنىن ايتتى. "كىلت رەسەي تاراپىنىڭ قولىندا. ەندى بۇكىل الەم كىمنىڭ بەيبىتشىلىكتى قالايتىنىن، ال كىمنىڭ تەك ءسوز جۇزىندە ايتىپ جۇرگەنىن كورەدى", – دەدى ەرماك.
