12 naýryz kúni Reseı prezıdentiniń baspasóz hatshysy Dmıtrıı Peskov AQSh pen Ýkraınanyń Djıddadaǵy kelissózderinde usynylǵan bastamalar Máskeýde zerttelip jatqanyn málimdedi, dep habarlaıdy "Adyrna" ulttyq portaly DW-ge silteme jasap.
Onyń aıtýynsha, Reseı tarapy AQSh memlekettik hatshysy Marko Rýbıo men ulttyq qaýipsizdik jónindegi kómekshi Maık Ýolttyń aldaǵy kúnderi Máskeýge kelissózder týraly aqparat berýin kútedi. Sonymen qatar, Peskov Reseı men AQSh arasynda joǵary deńgeıdegi telefon arqyly kelissózder bolýy múmkin ekenin joqqa shyǵarmady.
Reseı Federaııa keńesi soǵysty aıaqtaýǵa qatysty kez kelgen kelisim AQSh emes, Reseı talaptaryna saı jasalýy kerek dep málimdedi. Federaııa keńesi tóraǵasynyń orynbasary Konstantın Kosachevtiń aıtýynsha, Ýkraına AQSh aıtqan usynystardy qabyldap, olarmen kelisýge májbúr. Ol Reseıdiń jaǵdaıy basqasha ekenin jáne kelissózderdiń negizgi sharttary maıdan dalasynda anyqtalatynyn atap ótti.
Reuters agenttiginiń Reseıdegi derekkózderine súıensek, prezıdent Vladımır Pýtın AQSh usynǵan 30 kúndik atysty toqtatý bastamasyn naqty kepildiktersiz qabyldaýy ekitalaı. Reseılik sarapshylardyń pikirinshe, soǵystaǵy qazirgi jaǵdaı Reseı úshin tıimdi, al bitim usynysy qaqpan bolýy múmkin.
Ýkraına prezıdent keńsesiniń basshysy Andreı Ermak 30 kúndik ýaqytsha bitim máselesi 17-23 naýryz aralyǵynda talqylanýy múmkin ekenin habarlady. Onyń aıtýynsha, tehnıkalyq sarapshylar deńgeıinde kelissózderdiń egjeı-tegjeıi pysyqtalady.
Ermak AQSh-tyń Reseımen Djıddadaǵy kelissózder negizinde usynystardy talqylaýy qajet ekenin aıtty. "Kilt Reseı tarapynyń qolynda. Endi búkil álem kimniń beıbitshilikti qalaıtynyn, al kimniń tek sóz júzinde aıtyp júrgenin kóredi", – dedi Ermak.
