وسىدان 15 جىل بۇرىن، 2010 جىلى 11 ناۋرىزدان 12 ناۋرىزعا قاراعان ءتۇنى الماتى وبلىسىنداعى قىزىلاعاش سۋ قويماسىنداعى بوگەت بۇزىلىپ، قايعىلى وقيعا ورىن العان ەدى.
سالدارىنان اۋىلدى سۋ باسىپ، 45 ادام قازا تاپتى.
قىزىلاعاش اۋىلىندا شامامەن 3,5 مىڭ ادام تۇرعان، ولاردىڭ باسىم كوپشىلىگى – سىرتتان كەلگەن قانداستار. ءبىر مەزەتتە اۋىلدى بەس مەتردەن اساتىن تاسقىن سۋ شايىپ، باسپانالار قيراپ، مال مەن ادامداردى اعىزىپ اكەتتى.
146 ءۇي تولىقتاي جويىلىپ، 251 ءۇي قاتتى زاقىمداندى، 42 ۇيگە جوندەۋ قاجەت بولدى.
توتەنشە جاعدايلار قىزمەتى مەن اسكەريلەر وقيعا ورنىنا جەدەل جەتىپ، قۇتقارۋ جانە ىزدەستىرۋ جۇمىستارىن جۇرگىزدى. تىكۇشاقتار مەن ارنايى جاساق توپان سۋ باسقان اۋماقتى كۇن سايىن شولىپ، تۇرعىنداردى قاۋىپسىز ايماققا كوشىردى. قىزىلاعاش سۋ قويماسىنان اققان سۋ نەبارى 18 مينۋت ىشىندە اۋىلدى تۇگەل شايىپ كەتكەن.
قىزىلاعاشتاعى اپاتقا كىنالى دەپ قىزىلاعاش اۋىلدىق وكرۋگىنىڭ سول كەزدەگى اكىمى ەسەت ءجۇنىسوۆ، "قىزىلاعاش" سۋ قويماسىنىڭ باسشىسى، "شىنار" جشس ديرەكتورى قۋانىش بەكەەۆ، سۋ پايدالانۋشىلار ارناۋلى وندىرىستىك كووپەراتيۆىنىڭ اتقارۋشى ديرەكتورى مۇحيت ءجۇنىسوۆ، اقسۋ اۋداندىق توتەنشە جاعدايلار جونىندەگى ءبولىمنىڭ باستىعى كۇنىبەك بايزاقوۆ جانە الماتى وبلىسى بويىنشا توتەنشە جاعدايلار جونىندەگى دەپارتامەنت باستىعىنىڭ ورىنباسارى ەۆگەني ەنيندەر تانىلدى. ولار ءتۇرلى مەرزىمگە سوتتالدى.
