الماتىدا ايەل 4 جاستاعى ۇلىمەن بىرگە تەرەزەدەن سەكىرىپ كەتتى. قايعىلى وقيعا 11 ناۋرىزدا تاڭعى ۋاقىتتا الماتى قالاسىنداعى "كومفورت سيتي" تۇرعىن ءۇي كەشەنىندە بولعان، دەپ حابارلايدى “ادىرنا” ۇلتتىق پورتالى Orda.kz پورتالىنا سىلتەمە جاساپ.
اقپاراتقا سايكەس، 1990 جىلى تۋعان ايەل ءوزىنىڭ ءتورت جاسار ۇلىمەن بىرگە كوپقاباتتى ءۇيدىڭ تەرەزەسىنەن قۇلاپ كەتكەن. وقيعا ورنىنا جەدەل جاردەم قىزمەتى شاقىرتىلعانىمەن، ايەل سول جەردە كوز جۇمدى. ال ونىڭ 2021 جىلى تۋعان ۇلى اۋىر جاراقاتتارمەن اۋرۋحاناعا جەتكىزىلدى.
قازىرگى ۋاقىتتا بالا اۋىر حالدە جانساقتاۋ بولىمىندە جاتىر. دارىگەرلەر ونىڭ ءومىرى ءۇشىن كۇرەسۋدە. ماماندار ونىڭ جاعدايىن وتە اۋىر دەپ باعالاپ وتىر.
ازىرگە ايەلدىڭ ءوز ەركىمەن سەكىرگەنى نەمەسە باسقا بىرەۋدىڭ يتەرگەنى بەلگىسىز. قۇزىرلى ورگاندار تەرگەۋ جۇمىستارىن جۇرگىزىپ جاتىر. سونىمەن قاتار، وسى تۇرعىن ءۇي كەشەنىندە بۇعان دەيىن دە بىرنەشە قايعىلى وقيعالار بولعانى انىقتالدى.
مارقۇمنىڭ ەسىمى - ءاليا. وقيعانىڭ ءمان-جايى تەرگەۋ بارىسىندا بەلگىلى بولماق.
