“قازاق بالالارى تەڭدىككە جەتتى!”: قازىبەك يسادان كومەك سۇراعان وقۋشىلارعا گرانت ءبولىندى

3312
Adyrna.kz Telegram

الماتى قالاسى حيميا-بيولوگيا باعىتىنداعى نازارباەۆ زياتكەرلىك مەكتەبىندە بۇرىن ادىلەتسىزدىك جاسالعان قازاق توبىنا قوسىمشا 41 گرانت ءبولىندى. بۇل تۋرالى اقىن، قر پارلامەنتى ءماجىلىسى دەپۋتاتى. “اق جول” پارتياسى توراعاسىنىڭ ورىنباسارى قازىبەك يسا Facebook پاراقشاسىندا جاريالادى، دەپ حابارلايدى “ادىرنا” ۇلتتىق پورتالى.

“بۇل زور جەڭىس! الا جازداي اتتانداپ شاپقانىمىز دالاعا كەتپەدى!  الماتى قالاسى حيميا-بيولوگيا باعىتىنداعى نازارباەۆ زياتكەرلىك مەكتەبىندە بۇرىن ادىلەتسىزدىك جاسالعان قازاق توبىنا قوسىمشا 41 وقۋشىعا گرانت ءبولىندى!!! 

بۇل قۋانىشتى حاباردى ەستىگەندە ءوزىم نەمەسە ءوز بالام وقۋعا تۇسكەندەي قۋاندىم. كوز الدىما “مەن كۇندە تاڭعى 6-دان تۇرىپ، كەشكە دەيىن دايىندالدىم. ناتيجەسىندە ورىس بولىمىنە تۇسكەندەردەن 60 بال ارتىق السام دا، قازاق بولىمىنە تاپسىرعانىم ءۇشىن وقۋعا وتپەي قالدىم. مەنەن 60 بال تومەن العان ورىس بولىمىندەگى بالالار مىناۋ نازارباەۆ مەكتەبىندە وقىپ جاتىر!”- دەپ، بۇرىلىپ،  قولىمەن مەكتەپتىڭ اسەم عيماراتىن كورسەتىپ قويىپ، كوز جاسىن ءسۇرتىپ تۇرىپ، بۋلىعىپ، قورلىق پەن تەڭسىزدىككە، كورىنەۋ ادىلەتسىزدىككە  جارىلارداي زورعا  سويلەپ شىرىلداعان  قازاقتىڭ قارا دومالاقتارى  شىڭعىس سابىر مەن امانحان دىنمۇحانبەت باستاعان بالالاردىڭ  كوزدەرىنە تۋرا قاراي الاتىن بولدىم عوي دەپ قۋاندىم. ول بالاقاي ونىڭ ۆيدەوسىن قويىپ، ۇكىمەتكە سۇراۋ سالعان ماقالام جاريالانعان فەيسبۋكتاعى پاراقشاما ماعان باتا بەرگەن  ۆيدەوسىن سالىپ جىبەرىپتى! “پەرىشتەنىڭ تىلەگى ورىندالادى، ءاۋمين” دەپ قۋانىپ قالعانمىن! ءيا، 41 پەرىشتەنىڭ - 41 بالانىڭ تىلەگى ورىندالدى! اللا جار بولسىن!”،- دەپ جازدى ول.

قر پارلامەنتى ءماجىلىسى دەپۋتاتى، “اق جول” فراكتسياسى مۇشەسى قازىبەك يساعا جازباشا دا ، ۆيدەومەن دە ۇندەۋ جاساعان  بايسال تولەن، قۋانحان باقىتحان، مۋحامات بولاتبايقىزى باستاعان  50 شاقتى اتا-انا بولاتىن. بالانىڭ تىلەگىن جولدا قالدىرا الماعان قازىبەك يسا ادىلدىكتىڭ ورناۋى ءۇشىن نازارباەۆ زياتكەرلىك مەكتەبى” باسقارما ءتورايىمى ك.شامشادينوۆاعا ەسكەرتۋ جاسادى. سونداي-اق، گازەت پەن سايتتارعا قوعامدىق  رەزونانس تۋدىراتىن ماقالالار جاريالادى. ولار ۇلكەن قولداۋعا يە بولدى.

“بالاسى ۇزدىك وقىسا دا، وقۋعا تۇسە الماعان اتا-انانىڭ كۇيى ماعان بەلگىلى.  جوعارىدا مەن ء“وز بالام وقۋعا تۇسكەندەي قۋاندىم” دەپ بوسقا ايتقان جوقپىن.  ۇنەمى قالالىق، رەسپۋبليكالىق وليمپيادالاردا جۇلدە الىپ جۇرگەن، كەشە عانا استاناداعى بەلگىلى ۇلتشىل اعارتۋشى  اياتجان احمەتجانۇلى باسقاراتىن قايىم مۇقامەدحان اتىنداعى #90 ۇلتتىق گيمنازياسىنىڭ 9 سىنىبىن، نەگىزگى ورتا ءبىلىمىن تۇڭعىش  ۇزدىك اتتەستاتپەن بىتىرگەن قىزىم ءامينا جارىلقاسىن 2019 جىلى 6-شى سىنىپتى اياقتار كوكتەمدە تۋرا وسى الماتىداعى حيميا-بيولوگيا باعىتىنداعى نازارباەۆ زياتكەرلىك مەكتەبىنە سىناق تاپسىرىپ، نەگىزگى پاندەردەن جوعارى ۇپاي الىپ تۇرسا دا، باسقا جاناما پاندەردەن بالى تومەن بولعاندىقتان وتپەي قالعان ەدى…

ەندى كەزىندە ءوز بالام  وقۋعا وتپەسە دە، بۇگىن 41 بالامنىڭ وقۋعا تۇسۋىنە ۇلەس قوستىم عوي دەپ قۋانىشتى سەزىمدە وتىرمىن.  ءوز بالالارىما 41 بالا قوسىلىپ، الەمدەگى ەڭ باي اكە بولىپ وتىرعان جايىمىز بار!”،- دەدى قازىبەك يسا.

سونىمەن قاتار، ول وسى ىستە كۇش-جىگەرىن اياماعان قولداۋلاستارىنا العىس ءبىلدىردى.

 

پىكىرلەر