ساۋدا جانە ينتەگراتسيا ءمينيسترى ارمان شاققاليەۆ ساعات بەلدەۋىنىڭ وزگەرۋىنە بايلانىستى قازاقستاندىقتار قانداي جاعدايدا جاڭا جۇمىس كەستەسىنە اۋىسا الاتىنىن اتادى، دەپ حابارلايدى “ادىرنا” ۇلتتىق پورتالى Tengrinews.kz سايتىنا سىلتەپ.
مينيستر شىعىس قازاقستان وبلىسىن مىسال رەتىندە كەلتىردى.
«ايماقتاردا تالقىلاۋ بارىسىندا ءماسليحات دەپۋتاتتارى جۇمىس ۋاقىتىن وڭتايلاندىرۋ بويىنشا جۇمىس كەستەسىن رەتتەۋ باستاماسىن قولدادى. قازىرگى تاڭدا شىعىس قازاقستان وبلىسىنىڭ بىرقاتار اۋداندارىندا جۇمىس كەستەسى 08:00-دەن 17:30-عا دەيىن وزگەرتىلدى، بۇل تۇرعىندار تاراپىنان وڭ باعاسىن الدى»، — دەدى شاققاليەۆ ۇكىمەت وتىرىسىندا.
ونىڭ ايتۋىنشا، بۇل شارالار ازاماتتارعا ىڭعايلى جاعداي جاساۋعا جانە كاسىبي مەن جەكە ءومىر اراسىنداعى تەڭگەرىمدى جاقسارتۋعا باعىتتالعان.
«قاجەت بولعان جاعدايدا اتالعان تاجىريبەنى باسقا وڭىرلەردە جەرگىلىكتى اتقارۋشى ورگاندارمەن ۇيلەستىرۋ ارقىلى قولدانۋعا بولادى»، — دەپ قوستى مينيستر.
ەسكە سالساق، 2024 جىلعى 1 ناۋرىزدان باستاپ قازاقستاندا بىردەي ۋاقىت ەنگىزىلدى. استانا، الماتى، شىمكەنت، اقمولا، الماتى، جامبىل، قاراعاندى، قوستاناي، پاۆلودار، سولتۇستىك قازاقستان، تۇركىستان، شىعىس قازاقستان وبلىستارى، سونداي-اق اباي، جەتىسۋ جانە ۇلىتاۋ وبلىستارىندا ساعات ءتىلى 1 ساعاتقا ارتتىرىلعان. وسىلايشا، بۇكىل ەل UTC +5 ساعاتتىق بەلدەۋدە ءومىر سۇرە باستادى.
ءساۋىر ايىندا قازاقستاندىقتار ۋاقىتتى اۋىستىرۋدى توقتاتۋ تۋرالى پەتيتسيا باستاعان بولاتىن، ول 50 مىڭ قولداۋعا يە بولدى. تامىز ايىندا ساۋدا جانە ينتەگراتسيا مينيسترلىگى ساعات بەلدەۋى تۋرالى پەتيتسياعا قاتىستى تۇپكىلىكتى شەشىمىن جاريالاپ، پەتيتسيانى قاناعاتتاندىرمادى.
