الماتى اۋەجايىندا پىشاقپەن اۋەجاي قىزمەتكەرىن كەپىلگە الىپ، ريۋكزاگىندا "بومبا" بار دەپ جولاۋشىلاردى قورقىتقان ەر ادامعا قاتىستى ءۇش قىلمىستىق ءىس قوزعالدى، دەپ حابارلايدى "ادىرنا" ۇلتتىق پورتالى Polisia.kz-كە سىلتەمە جاساپ.
وقيعا بويىنشا "كەپىلگە الۋ", "قارۋ قولدانۋ ارقىلى بۇزاقىلىق جاساۋ" جانە "تەرروريزم اكتىسى تۋرالى جالعان حابارلاما تاراتۋ" باپتارىمەن قىلمىستىق ءىس قوزعالعان.
سوت شەشىمىمەن كۇدىكتى ەكى ايعا قاماۋعا الىندى.
ءىىم باسشىسى ەرجان سادەنوۆتىڭ تاپسىرماسىمەن ەلدەگى اۋەجايلار مەن ۆوكزالدارداعى قاۋىپسىزدىك جۇيەسى قايتا تەكسەرىلۋدە.
ارنايى توپ وسال تۇستاردى انىقتاپ، باقىلاۋدى كۇشەيتۋ، جەدەل ارەكەت ەتۋ الگوريتمىن جەتىلدىرۋ جانە قاۋىپسىزدىك قىزمەتكەرلەرىن وقىتۋ بويىنشا شارالار قابىلداۋدا.
ۆەدومستۆو بۇل جاعدايدىڭ تولىق باقىلاۋدا ەكەنىن جانە بولاشاقتا وسىنداي وقيعالاردىڭ الدىن الۋ ءۇشىن قاجەتتى جۇمىستار جۇرگىزىلەتىنىن مالىمدەدى.
