قازاقستاندا ءۇش كۇنگە سوزىلعان "قارۋ" جەدەل-پروفيلاكتيكالىق شاراسى بارىسىندا 30-دان استام جاسىرىن قارۋ قويماسى تابىلىپ، 360 اتىس قارۋى، 12 گراناتا جانە ءۇش مىڭنان استام وق-ءدارى تاركىلەندى، دەپ حابارلايدى "ادىرنا" ۇلتتىق پورتالى Polisia.kz-كە سىلتەمە جاساپ.
مينيسترلىكتىڭ مالىمەتىنشە، تاركىلەنگەن قارۋ-جاراقتاردىڭ ىشىندە بۇرىن ۇرلانعان جەتى قارۋ انىقتالعان، ونىڭ تورتەۋى قاڭتار وقيعاسى كەزىندە قولدى بولعان.
"بۇرىن جوعالعان التى قارۋ تاركىلەنىپ، 14 قارۋ ەرىكتى تۇردە تاپسىرىلدى", - دەدى ءىىم كريمينالدىق پوليتسيا دەپارتامەنتىنىڭ باستىعى قانات نۇرماعامبەتوۆ.
وپەراتسيا بارىسىندا 120 زاڭسىز قارۋ ساقتاۋ جانە الىپ ءجۇرۋ فاكتىسى انىقتالىپ، 200 ادام اكىمشىلىك جاۋاپكەرشىلىككە تارتىلعان.
ءىىم ازاماتتارعا قارۋدى كەز كەلگەن ۋاقىتتا ەرىكتى تۇردە تاپسىرۋ مۇمكىندىگى بار ەكەنىن جانە بۇل ءۇشىن ەشقانداي قۇقىقتىق سالدار بولمايتىنىن ەسكە سالادى.
