وزبەكستان پرەزيدەنتى شاۆكات ميرزيوەۆ 8 ناۋرىز – حالىقارالىق ايەلدەر كۇنىنە ارنالعان سالتاناتتى جيىندا تاۋار-ونەركاسىپ پالاتاسى جانىنان كاسىپكەر ايەلدەر كەڭەسىن قۇرۋدى ۇسىندى. بۇل كەڭەس بيزنەستەگى ايەلدەردىڭ ماسەلەلەرىن كوتەرىپ، ولاردىڭ مۇددەسىن قورعايدى، دەپ حابارلايدى "ادىرنا" ۇلتتىق پورتالى.
پرەزيدەنتتىڭ ايتۋىنشا، بۇل كەڭەس پارلامەنتكە تىكەلەي ۇسىنىستار بەرىپ، كاسىپكەر ايەلدەردىڭ قۇقىقتارىن قورعاۋعا ىقپال ەتەدى. جاڭا قۇرىلىمدى ۇيىمداستىرۋ مىندەتى تاۋار-ونەركاسىپ پالاتاسى توراعاسىنىڭ ورىنباسارى نوديرا شوتۋرسۋنوۆاعا جۇكتەلدى.
وزبەكستاندا جۇمىسسىزدىقپەن كۇرەسكە باعىتتالعان ءىرى مەملەكەتتىك باعدارلامالار جۇزەگە اسىرىلۋدا. پرەزيدەنتتىڭ مالىمەتىنشە، وتكەن جىلى بۇل ماقساتقا 17 ترلن سۋم (1,3 ملرد دوللار) بولىنگەن. ناتيجەسىندە ايەل كاسىپكەرلەر 81 ترلن سۋم (6,2 ملرد دوللار) كولەمىندە ءونىم ءوندىرىپ، 450 ملن دوللارلىق ەكسپورت جاساعان.
كوپتەگەن كاسىپكەر ايەلدەر ماحاللا تۇرعىندارىن جۇمىسقا تارتىپ، ولاردى جاڭا ماماندىقتارعا وقىتۋدا.
"وسىنداي الەۋمەتتىك جاۋاپكەرشىلىكتى موينىنا العان كاسىپكەر ايەلدەردى مەن جاڭا وزبەكستاننىڭ قۇرىلىسشىلارى دەپ سانايمىن جانە ولارعا زور ريزاشىلىعىمدى بىلدىرەمىن. ولاردىڭ دامۋى ءۇشىن قوسىمشا جاعدايلار مەن جەڭىلدىكتەر جاسايمىن", – دەدى پرەزيدەنت.
2024 جىلى ەكى ميلليون ايەلدى جۇمىسپەن قامتۋ، ونىڭ ىشىندە جارتىسىنان استامىن كاسىپكەرلىككە تارتۋ مىندەتى قويىلعان. بۇل ماقساتتا بانكتەر جاڭا بيزنەس باستايتىن ايەلدەرگە ءتيىمدى نەسيە پاكەتتەرىن ۇسىنادى.
پرەزيدەنت اتاپ وتكەندەي، ايەلدەردىڭ قۇقىعى مەن مارتەبەسىن ارتتىرۋ مەملەكەتتىك ساياساتتىڭ باسىم باعىتتارىنىڭ ءبىرى.
مەملەكەت ايەلدەردى الەۋمەتتىك جاعىنان قورعاۋ جۇمىستارىن جالعاستىرادى. ياعني، 162 مىڭ مۇمكىندىگى شەكتەۋلى ايەلگە ساناتوريلەر مەن كلينيكالاردا مەديتسينالىق كومەك كورسەتىلەدى. 130 اسىراۋشىسىنان ايىرىلعان ايەلگە قارجىلاي كومەك بەرىلەدى. 6 مىڭ ايەلدىڭ تۇرعىن ءۇي جاعدايىن جاقسارتۋ جوسپارلانعان.
ء"بىز ەلىمىزدىڭ الەۋەتىنە سۇيەنە وتىرىپ، رەفورمالاردى جاڭا دەڭگەيگە كوتەرۋگە بەل بۋدىق. بۇل جولدا ءبىزدىڭ ايەلدەر قاۋىمى ءاردايىم كوشباسشى بولادى دەپ سەنەمىن", – دەپ تۇيىندەدى ميرزيوەۆ.
