Ózbekstan prezıdenti Shavkat Mırzııoev 8 naýryz – Halyqaralyq áıelder kúnine arnalǵan saltanatty jıynda Taýar-ónerkásip palatasy janynan Kásipker áıelder keńesin qurýdy usyndy. Bul keńes bıznestegi áıelderdiń máselelerin kóterip, olardyń múddesin qorǵaıdy, dep habarlaıdy "Adyrna" ulttyq portaly.
Prezıdenttiń aıtýynsha, bul keńes parlamentke tikeleı usynystar berip, kásipker áıelderdiń quqyqtaryn qorǵaýǵa yqpal etedi. Jańa qurylymdy uıymdastyrý mindeti Taýar-ónerkásip palatasy tóraǵasynyń orynbasary Nodıra Shotýrsýnovaǵa júkteldi.
Ózbekstanda jumyssyzdyqpen kúreske baǵyttalǵan iri memlekettik baǵdarlamalar júzege asyrylýda. Prezıdenttiń málimetinshe, ótken jyly bul maqsatqa 17 trln sým (1,3 mlrd dollar) bólingen. Nátıjesinde áıel kásipkerler 81 trln sým (6,2 mlrd dollar) kóleminde ónim óndirip, 450 mln dollarlyq eksport jasaǵan.
Kóptegen kásipker áıelder mahalla turǵyndaryn jumysqa tartyp, olardy jańa mamandyqtarǵa oqytýda.
"Osyndaı áleýmettik jaýapkershilikti moınyna alǵan kásipker áıelderdi men Jańa Ózbekstannyń qurylysshylary dep sanaımyn jáne olarǵa zor rızashylyǵymdy bildiremin. Olardyń damýy úshin qosymsha jaǵdaılar men jeńildikter jasaımyn", – dedi prezıdent.
2024 jyly eki mıllıon áıeldi jumyspen qamtý, onyń ishinde jartysynan astamyn kásipkerlikke tartý mindeti qoıylǵan. Bul maqsatta bankter jańa bıznes bastaıtyn áıelderge tıimdi nesıe paketterin usynady.
Prezıdent atap ótkendeı, áıelderdiń quqyǵy men mártebesin arttyrý memlekettik saıasattyń basym baǵyttarynyń biri.
Memleket áıelderdi áleýmettik jaǵynan qorǵaý jumystaryn jalǵastyrady. Iaǵnı, 162 myń múmkindigi shekteýli áıelge sanatorııler men klınıkalarda medıınalyq kómek kórsetiledi. 130 asyraýshysynan aıyrylǵan áıelge qarjylaı kómek beriledi. 6 myń áıeldiń turǵyn úı jaǵdaıyn jaqsartý josparlanǵan.
"Biz elimizdiń áleýetine súıene otyryp, reformalardy jańa deńgeıge kóterýge bel býdyq. Bul jolda bizdiń áıelder qaýymy árdaıym kóshbasshy bolady dep senemin", – dep túıindedi Mırzııoev.
