مەملەكەت باسشىسى قاسىم-جومارت توقاەۆ 8 ناۋرىز – حالىقارالىق ايەلدەر كۇنىمەن قازاقستاندىقتاردى قۇتتىقتادى. پرەزيدەنتتىڭ قۇتتىقتاۋىندا ايەلدەر قاۋىمىنىڭ قوعامداعى ءرولى ەرەكشە اتاپ ءوتىلدى، دەپ حابارلايدى "ادىرنا" ۇلتتىق پورتالى.
اقوردانىڭ ءباسپاسوز قىزمەتى جاريالاعان قۇتتىقتاۋ ماتىنىندە:
«قىمباتتى حانىمدار! بارشاڭىزدى حالىقارالىق ايەلدەر كۇنىمەن شىن جۇرەكتەن قۇتتىقتايمىن! بۇل – سۇلۋلىق پەن مەيىرىمدىلىكتىڭ سيمۆولىنا اينالعان شۋاقتى مەرەكە. حالقىمىز ەجەلدەن اناسىن ارداقتاپ، قىزدارىن قادىرلەي بىلگەن. كوپتەگەن ارۋلارىمىزدىڭ ەسىمى ءتول تاريحىمىزعا التىن ارىپپەن جازىلعان. قازىر قازاقستاندا ايەلدەر ءتۇرلى كاسىپپەن اينالىسىپ، بيزنەستە جانە قوعامدىق قىزمەتتە زور تابىسقا جەتىپ ءجۇر. ولار بيىك بەلەستەردى باعىندىرىپ قانا قويماي، سانالى ۇرپاق تاربيەلەۋ جولىندا ايانباي ەڭبەك ەتىپ كەلەدى»، – دەلىنگەن.
مەملەكەت باسشىسى بارلىق ايەلدەردىڭ ادال ەڭبەگى جوعارى باعالاناتىنىن اتاپ ءوتىپ، قازاقستانداعى انالار مەن ارۋلارعا شىنايى ريزاشىلىعىن ءبىلدىردى. سونداي-اق، ەلدەگى ايەلدەردىڭ قۇقىقتارىن قورعاۋ جانە ولاردىڭ جان-جاقتى دامۋىنا جاعداي جاساۋ مەملەكەتتىك ساياساتتىڭ باسىم باعىتتارىنىڭ ءبىرى ەكەنىن جەتكىزدى.
«جاناشىرلىق، جاۋاپكەرشىلىك، جاسامپازدىق سياقتى اسىل قاسيەتتەردى بويىنا سىڭىرگەن ايەلدەر قاۋىمى ەلىمىزدەگى اۋقىمدى وزگەرىستەردى جۇزەگە اسىرۋعا زور ۇلەس قوسا بەرەدى دەپ سەنەمىن»، – دەپ تۇيىندەدى پرەزيدەنت.
