Memleket basshysy Qasym-Jomart Toqaev 8 naýryz – Halyqaralyq áıelder kúnimen qazaqstandyqtardy quttyqtady. Prezıdenttiń quttyqtaýynda áıelder qaýymynyń qoǵamdaǵy róli erekshe atap ótildi, dep habarlaıdy "Adyrna" ulttyq portaly.
Aqordanyń baspasóz qyzmeti jarııalaǵan quttyqtaý mátininde:
«Qymbatty hanymdar! Barshańyzdy Halyqaralyq áıelder kúnimen shyn júrekten quttyqtaımyn! Bul – sulýlyq pen meıirimdiliktiń sımvolyna aınalǵan shýaqty mereke. Halqymyz ejelden anasyn ardaqtap, qyzdaryn qadirleı bilgen. Kóptegen arýlarymyzdyń esimi tól tarıhymyzǵa altyn árippen jazylǵan. Qazir Qazaqstanda áıelder túrli kásippen aınalysyp, bızneste jáne qoǵamdyq qyzmette zor tabysqa jetip júr. Olar bıik belesterdi baǵyndyryp qana qoımaı, sanaly urpaq tárbıeleý jolynda aıanbaı eńbek etip keledi», – delingen.
Memleket basshysy barlyq áıelderdiń adal eńbegi joǵary baǵalanatynyn atap ótip, Qazaqstandaǵy analar men arýlarǵa shynaıy rızashylyǵyn bildirdi. Sondaı-aq, eldegi áıelderdiń quqyqtaryn qorǵaý jáne olardyń jan-jaqty damýyna jaǵdaı jasaý memlekettik saıasattyń basym baǵyttarynyń biri ekenin jetkizdi.
«Janashyrlyq, jaýapkershilik, jasampazdyq sııaqty asyl qasıetterdi boıyna sińirgen áıelder qaýymy elimizdegi aýqymdy ózgeristerdi júzege asyrýǵa zor úles qosa beredi dep senemin», – dep túıindedi Prezıdent.
