وڭتۇستىك كورەيانىڭ پرەزيدەنتى يۋن سوك يول قاماۋدان بوساتىلدى. سەبەبى سوت ونى قاماۋعا الۋدى توقتاتۋ تۋرالى ءوتىنىشىن قاناعاتتاندىرعان. بۇل تۋرالى Yonhap اگەنتتىگى جاريالادى، دەپ حابارلايدى “ادىرنا” ۇلتتىق پورتالى.
اقپاراتقا سايكەس، يمپيچمەنت جاريالانعان پرەزيدەنت يۋن سوك يول جۇما كۇنى قاماۋدان بوساتىلدى. سوت ونىڭ قىسقا مەرزىمدى اسكەري توتەنشە جاعداي ەنگىزۋىنە بايلانىستى قاماۋعا الۋىن جويۋ تۋرالى ءوتىنىشىن قاناعاتتاندىردى.
وتكەن ايدا يۋن سەۋلدىڭ ورتالىق اۋداندىق سوتىنا ءوتىنىش بەرىپ، 3 جەلتوقساندا اسكەري جاعداي ەنگىزگەنى ءۇشىن تاعىلعان ايىپتىڭ زاڭسىز ەكەنىن مالىمدەگەن ەدى.
ەسكە سالساق، 2024 جىلى 31 جەلتوقساندا كورەيا پرەزيدەنتىن قاماۋعا الۋ تۋرالى وردەر شىعارىلعان بولاتىن. سەۋل سوتى اسكەري جاعداي ەنگىزۋىنە بايلانىستى قىزمەتىنەن ۋاقىتشا شەتتەتىلگەن پرەزيدەنت يۋن سوك ءيولدى قاماۋعا الۋ تۋرالى قۇقىق قورعاۋ ورگاندارىنىڭ سۇرانىسىن قاناعاتتاندىردى. وسىلايشا، ول وڭتۇستىك كورەيانىڭ قىزمەت ۇستىندەگى العاشقى قاماۋعا الىنعان پرەزيدەنتى اتانعان ەدى.
