اتىراۋ وبلىسىندا تالدىكول اۋىلىنىڭ تۇرعىندارى جول ماسەلەسىنە بايلانىستى نارازىلىق ءبىلدىردى، دەپ حابارلايدى “ادىرنا” ۇلتتىق پورتالى اق جايىققا سىلتەپ.
اتىراۋ وبلىسىنا قاراستى تالدىكول اۋىلىنىڭ تۇرعىندارى اۋىلعا كىرەبەرىس جولدىڭ كۇردەلى جوندەۋسىز قالۋىنا بايلانىستى نارازىلىققا شىقتى. اۋىل حالقى جول ماسەلەسى شەشىلمەي كەلە جاتقانىنا 10 جىلدان اسقانىن ايتىپ، ۋادە بەرگەن جەرگىلىكتى بيلىكتىڭ ارەكەتسىزدىگىنە نارازى.
تالدىكولدە 1230 ادام تۇرادى، ولاردىڭ كوپشىلىگى اتىراۋ قالاسىندا جۇمىس ىستەيدى. الايدا اۋىلعا كىرەتىن 6,2 شاقىرىمدىق جولدىڭ ناشار جاعدايى، اسىرەسە، جاڭبىرلى ماۋسىم مەن كوكتەمگى قار ەرۋ كەزىندە تۇرعىنداردىڭ قاتىناۋىنا ۇلكەن قيىندىق تۋدىرادى.
“ون جىلدان بەرى تەك جينالىس وتكىزىپ، ۋادە بەرەدى دە، كەيىن ۇمىتىپ كەتەدى. ەگەر ءوز مىندەتتەرىن اتقارا الماسا، نەگە ورىندارىن بوساتپايدى؟” – دەيدى تۇرعىنداردىڭ ءبىرى.
2023 جىلى جولدى جوندەۋگە بيۋدجەتتەن 1 ملرد 984 ملن تەڭگە بولىنگەن. تامىز ايىندا اۋدان اكىمدىگى مەردىگەر “اۆس ليميتەد” جشس-مەن كەلىسىمشارت جاساپ، قۇرىلىس جۇمىستارى باستالعان. جوسپار بويىنشا، جولدىڭ كۇردەلى جوندەۋى 2024 جىلى اياقتالۋى ءتيىس ەدى. الايدا قازىرگى تاڭدا تەك 500 مەترى عانا سالىنعان، ال مەردىگەرگە جۇمىس ءۇشىن قاراجات تولىق تولەنگەن.
اۋدان اكىمدىگى جوبالىق-سمەتالىق قۇجاتتامادا قاتەلىكتەر كەتكەنىن مويىندادى. سونىمەن قاتار، 2024 جىلعى سۋ تاسقىنى سالدارىنان جولدىڭ نەگىزگى قاباتى زاقىمدانعانىن العا تارتىپ وتىر.
“سۋ تاسقىنىنان كەيىن جولدىڭ نەگىزى ءبۇلىندى، سول سەبەپتى قۇرىلىس جۇمىستارى ۋاقىتشا توقتاتىلدى. قازىر جوبالىق-سمەتالىق قۇجاتتاما قايتا دايىندالىپ، وبلىستىق بيۋدجەت كوميسسياسىنىڭ قاراۋىنا جىبەرىلدى. شەشىمىن كۇتىپ وتىرمىز”، – دەيدى اۋدان اكىمىنىڭ ورىنباسارى اسحات ايمۇراتوۆ.
