Atyrau oblysynda Taldyköl auylynyŋ tūrǧyndary jol mäselesıne bailanysty narazylyq bıldırdı, dep habarlaidy “Adyrna” ūlttyq portaly Aq Jaiyqqa sıltep.
Atyrau oblysyna qarasty Taldyköl auylynyŋ tūrǧyndary auylǧa kıreberıs joldyŋ kürdelı jöndeusız qaluyna bailanysty narazylyqqa şyqty. Auyl halqy jol mäselesı şeşılmei kele jatqanyna 10 jyldan asqanyn aityp, uäde bergen jergılıktı bilıktıŋ äreketsızdıgıne narazy.
Taldykölde 1230 adam tūrady, olardyŋ köpşılıgı Atyrau qalasynda jūmys ısteidı. Alaida auylǧa kıretın 6,2 şaqyrymdyq joldyŋ naşar jaǧdaiy, äsırese, jaŋbyrly mausym men köktemgı qar eru kezınde tūrǧyndardyŋ qatynauyna ülken qiyndyq tudyrady.
“On jyldan berı tek jinalys ötkızıp, uäde beredı de, keiın ūmytyp ketedı. Eger öz mındetterın atqara almasa, nege oryndaryn bosatpaidy?” – deidı tūrǧyndardyŋ bırı.
2023 jyly joldy jöndeuge biudjetten 1 mlrd 984 mln teŋge bölıngen. Tamyz aiynda audan äkımdıgı merdıger “AVS Limited” JŞS-men kelısımşart jasap, qūrylys jūmystary bastalǧan. Jospar boiynşa, joldyŋ kürdelı jöndeuı 2024 jyly aiaqtaluy tiıs edı. Alaida qazırgı taŋda tek 500 metrı ǧana salynǧan, al merdıgerge jūmys üşın qarajat tolyq tölengen.
Audan äkımdıgı jobalyq-smetalyq qūjattamada qatelıkter ketkenın moiyndady. Sonymen qatar, 2024 jylǧy su tasqyny saldarynan joldyŋ negızgı qabaty zaqymdanǧanyn alǧa tartyp otyr.
“Su tasqynynan keiın joldyŋ negızı bülındı, sol sebeptı qūrylys jūmystary uaqytşa toqtatyldy. Qazır jobalyq-smetalyq qūjattama qaita daiyndalyp, oblystyq biudjet komissiiasynyŋ qarauyna jıberıldı. Şeşımın kütıp otyrmyz”, – deidı audan äkımınıŋ orynbasary Ashat Aimūratov.
Ūqsas jaŋalyqtar
Salyqtyŋ sūrauyn, talabyn bılmeitınımız, salyq maŋyzyn tüsınbeitınımızdıŋ sebebın nede dep oilaisyz?
