رەسەي پرەزيدەنتى ۆلاديمير پۋتين مەن اقش-تىڭ ارنايى وكىلى ستيۆەن ۋيتكوففتىڭ كەلىسسوزى اياقتالدى. كەزدەسۋ كرەملدە ءوتتى، شامامەن ءۇش ساعاتقا سوزىلدى. وعان سونداي-اق رەسەي پرەزيدەنتىنىڭ كومەكشىسى يۋري ۋشاكوۆ پەن رەسەيدىڭ تىكەلەي ينۆەستيتسيالار قورىنىڭ (رفپي) باسشىسى كيريلل دميتريەۆ تە قاتىستى، دەپ حابارلايدى “ادىرنا” ۇلتتىق پورتالى.
كەلىسسوزدەردىڭ قورىتىندىسىن كيريلل دميتريەۆ X الەۋمەتتىك جەلىسىندە جازدى.
“ماسكەۋدە - پرەزيدەنت پۋتين مەن ستيۆەن ۋيتكوففتىڭ كەزدەسۋى. ىلگەرىلەۋگە قول جەتكىزىپ جاتىرمىز”، دەدى ول.
رەسەي باسشىسىنىڭ كومەكشىسى يۋري ۋشاكوۆ جۋرناليستەرگە بەرگەن سۇحباتىندا كەزدەسۋدىڭ كونسترۋكتيۆتى جانە پايدالى سيپاتتا وتكەنىن مالىمدەدى. اڭگىمە رەسەي مەن اقش-تىڭ ۇستانىمدارىن تەك ۋكراينا ماسەلەسىندە عانا ەمەس، باسقا دا بىرقاتار حالىقارالىق ماسەلەلەر بويىنشا جاقىنداتۋعا مۇمكىندىك بەردى.
ونىڭ ايتۋىنشا، رەسەي مەن ۋكراينا اراسىنداعى تىكەلەي كەلىسسوزدەردى قايتا باستاۋ مۇمكىندىگى دە ءسوز بولعان.
سونداي-اق، ول رەسەي-اقش ديالوگىنىڭ ءتۇرلى دەڭگەيدە بەلسەندى تۇردە جالعاسا بەرەتىنىن اتاپ ءوتتى.
ۋيتكوفف ماسكەۋگە 25 ءساۋىر كۇنى تاڭەرتەڭ كەلگەن. كەيىنىرەك رەسەي پرەزيدەنتىنىڭ ءباسپاسوز حاتشىسى د. پەسكوۆ رەسەيلىك كوشباسشى مەن امەريكالىق اكىمشىلىك وكىلىنىڭ كەزدەسۋى باستالعانىن حابارلادى، سونداي-اق ولاردىڭ ءبىر-بىرىمەن امانداسقان ءساتى تۇسىرىلگەن ۆيدەو جاريالاندى.
باق-تا سونداي-اق ۋيتكوففتىڭ ماسكەۋ ورتالىعىندا رەسەي پرەزيدەنتىنىڭ شەت ەلدەرمەن ينۆەستيتسيالىق-ەكونوميكالىق ىنتىماقتاستىق جونىندەگى ارنايى وكىلى كيريلل دميتريەۆپەن بىرگە سەرۋەندەگەن ۆيدەوسى تارادى.
ەسكە سالساق، بۇل ولاردىڭ سوڭعى ەكى اپتا ىشىندەگى ەكىنشى كەزدەسۋى. بۇعان دەيىن ولار 11 ساۋىردە سانكت-پەتەربۋرگتە كەزدەسىپ، ول كەزدەسۋ شامامەن بەس ساعاتقا سوزىلعان.
