ءماجىلىس دەپۋتاتى جارقىنبەك امانتايۇلى قازاقستان رەسپۋبليكاسى پرەمەر-ءمينيسترىنىڭ ءبىرىنشى ورىنباسارى رومان سكليارعا جانە پرەمەر-ءمينيستردىڭ ورىنباسارى ەرمەك كوشەرباەۆقا جولداعان دەپۋتاتتىق ساۋالىندا جاسوسپىرىمدەردىڭ الەۋمەتتىك جەلىلەرگە تاۋەلدىلىگى ماسەلەسىن كوتەردى.
ول الەمدىك تاجىريبەنى مىسالعا كەلتىرە وتىرىپ، الەۋمەتتىك جەلىلەردىڭ بالالارعا زياندى اسەرىن اتاپ ءوتتى. حالىقارالىق زەرتتەۋلەرگە سايكەس، ينتەرنەتكە تاۋەلدىلىك جاستار اراسىندا دەپرەسسيانى كۇشەيتىپ، نازار اۋدارۋ قابىلەتىن تومەندەتىپ، ادامدار اراسىنداعى شىنايى قارىم-قاتىناستى السىرەتەدى.
دەپۋتاتتىڭ مالىمەتىنشە، قازاقستاندا بالالاردىڭ 88%-ىندا جەكە سمارتفون بار، ال ولاردىڭ 28%-ى بارلىق بوس ۋاقىتىن گادجەتتە وتكىزەدى. سونىمەن قاتار، جاسوسپىرىمدەردىڭ 74%-ى TikTok, 59%-ى YouTube, 57%-ى Instagram جەلىلەرىن بەلسەندى قولدانادى. اتا-انالاردىڭ 62%-ى بالالاردىڭ ەكران الدىنداعى ۋاقىتىن باقىلامايدى، بۇل ولاردىڭ قاۋىپسىزدىگىنە قاتەر توندىرەدى.
الەمدىك تاجىريبەدە بىرقاتار ەلدەر جاسوسپىرىمدەردىڭ ينتەرنەتكە قولجەتىمدىلىگىن شەكتەۋدى زاڭنامالىق دەڭگەيدە رەتتەگەن. قىتاي 2023 جىلى بالالاردىڭ كەشكى 22:00-دەن تاڭعى 6:00-گە دەيىن سمارتفون پايدالانۋعا تىيىم سالاتىن زاڭ جوباسىن ۇسىندى. فرانتسيا 15 جاسقا دەيىنگى وقۋشىلاردىڭ مەكتەپتەردە تەلەفون پايدالانۋىنا شەكتەۋ قويدى. وڭتۇستىك كورەيا مەن كانادادا ينتەرنەتكە تاۋەلدى بالالاردى ەمدەيتىن ارنايى ساۋىقتىرۋ ورتالىقتارى جۇمىس ىستەيدى.
وسىعان بايلانىستى، دەپۋتات قازاقستاندا جاسوسپىرىمدەردىڭ الەۋمەتتىك جەلىلەردى پايدالانۋىن زاڭمەن رەتتەۋدى ۇسىندى.
