Májilis depýtaty Jarqynbek Amantaıuly Qazaqstan Respýblıkasy Premer-Mınıstriniń birinshi orynbasary Roman Sklıarǵa jáne Premer-Mınıstrdiń orynbasary Ermek Kósherbaevqa joldaǵan depýtattyq saýalynda jasóspirimderdiń áleýmettik jelilerge táýeldiligi máselesin kóterdi.
Ol álemdik tájirıbeni mysalǵa keltire otyryp, áleýmettik jelilerdiń balalarǵa zııandy áserin atap ótti. Halyqaralyq zertteýlerge sáıkes, ınternetke táýeldilik jastar arasynda depressııany kúsheıtip, nazar aýdarý qabiletin tómendetip, adamdar arasyndaǵy shynaıy qarym-qatynasty álsiretedi.
Depýtattyń málimetinshe, Qazaqstanda balalardyń 88%-ynda jeke smartfon bar, al olardyń 28%-y barlyq bos ýaqytyn gadjette ótkizedi. Sonymen qatar, jasóspirimderdiń 74%-y TikTok, 59%-y YouTube, 57%-y Instagram jelilerin belsendi qoldanady. Ata-analardyń 62%-y balalardyń ekran aldyndaǵy ýaqytyn baqylamaıdy, bul olardyń qaýipsizdigine qater tóndiredi.
Álemdik tájirıbede birqatar elder jasóspirimderdiń ınternetke qoljetimdiligin shekteýdi zańnamalyq deńgeıde rettegen. Qytaı 2023 jyly balalardyń keshki 22:00-den tańǵy 6:00-ge deıin smartfon paıdalanýǵa tyıym salatyn zań jobasyn usyndy. Franııa 15 jasqa deıingi oqýshylardyń mektepterde telefon paıdalanýyna shekteý qoıdy. Ońtústik Koreıa men Kanadada ınternetke táýeldi balalardy emdeıtin arnaıy saýyqtyrý ortalyqtary jumys isteıdi.
Osyǵan baılanysty, depýtat Qazaqstanda jasóspirimderdiń áleýmettik jelilerdi paıdalanýyn zańmen retteýdi usyndy.
