استانا قالاسىنىڭ مامانداندىرىلعان اۋدانارالىق سوتىنىڭ ۇكىمىمەن "بولاشاق ساۋلەتشىلەرى" قورىنىڭ نەگىزىن قالاۋشى مارات ابيەۆ پەن ونىڭ سىبايلاستارى سوتتالدى، دەپ حابارلايدى "ادىرنا" ۇلتتىق پورتالى.
ول ۇيىمداسقان قىلمىستىق توپتى قۇرۋ جانە باسقارۋ، مۇناي مەن مۇناي ونىمدەرىن زاڭسىز ساتىپ الۋ، ساتۋ، ساقتاۋ، تاسىمالداۋ جانە وڭدەۋ، ەكونوميكالىق كونتراباندا باپتارى بويىنشا كىنالى دەپ تانىلىپ، 9 جىلعا باس بوستاندىعىنان ايىرىلدى. سونىمەن قاتار، مەملەكەتتىك قىزمەتتە ءومىر بويىنا قىزمەت ەتۋىنە تىيىم سالىنىپ، قوعامدىق بىرلەستىكتەردى قۇرۋ جانە باسقارۋ قۇقىعىنان 5 جىلعا شەتتەتىلدى.
ونىڭ سىبايلاستارى 8 جىلعا سوتتالدى.
سوت ۇكىمىمەن ايىپتالۋشىلاردىڭ مۇلكى تاركىلەنىپ، كونتراباندالىق جولمەن الىنعان 6 ميلليارد تەڭگەدەن استام قىلمىستىق تابىسى مەملەكەت پايداسىنا وتكىزىلدى.
تەرگەۋ بارىسىندا 2018-2022 جىلدار ارالىعىندا ابيەۆ پەن ونىڭ سەرىكتەستەرى اقتوبە وبلىسىنداعى مۇناي وڭدەۋ زاۋىتىندا تىيىم سالىنعان "ك-2" ەكولوگيالىق كلاستى ديزەل وتىنىن ءوندىرىپ، 50,6 مىڭ توننا ءونىمدى زاڭسىز ساتىپ، 11,3 ميلليارد تەڭگە پايدا تاپقانى انىقتالدى. ونىڭ 22,6 مىڭ تونناسى (6,7 ميلليارد تەڭگەگە) شەتەلگە كونتراباندالىق جولمەن شىعارىلعان.
زاڭسىز مۇناي اينالىمىنان تۇسكەن قاراجات "Genesis" (نەمەسە "بولاشاق ساۋلەتشىلەرى") اتتى زاڭسىز قوعامدىق بىرلەستىكتىڭ قىزمەتىن قارجىلاندىرۋعا جۇمسالعان. ونى قۇرىپ باسقارعانى ءۇشىن 2023 جىلدىڭ 21 تامىزىندا ابيەۆ 7 جىلعا سوتتالعان بولاتىن.
سوت ۇكىمى ءالى زاڭدى كۇشىنە ەنگەن جوق.
