Astana qalasynyń mamandandyrylǵan aýdanaralyq sotynyń úkimimen "Bolashaq sáýletshileri" qorynyń negizin qalaýshy Marat Ábıev pen onyń sybaılastary sottaldy, dep habarlaıdy "Adyrna" ulttyq portaly.
Ol uıymdasqan qylmystyq topty qurý jáne basqarý, munaı men munaı ónimderin zańsyz satyp alý, satý, saqtaý, tasymaldaý jáne óńdeý, ekonomıkalyq kontrabanda baptary boıynsha kináli dep tanylyp, 9 jylǵa bas bostandyǵynan aıyryldy. Sonymen qatar, memlekettik qyzmette ómir boıyna qyzmet etýine tyıym salynyp, qoǵamdyq birlestikterdi qurý jáne basqarý quqyǵynan 5 jylǵa shettetildi.
Onyń sybaılastary 8 jylǵa sottaldy.
Sot úkimimen aıyptalýshylardyń múlki tárkilenip, kontrabandalyq jolmen alynǵan 6 mıllıard teńgeden astam qylmystyq tabysy memleket paıdasyna ótkizildi.
Tergeý barysynda 2018-2022 jyldar aralyǵynda Ábıev pen onyń seriktesteri Aqtóbe oblysyndaǵy munaı óńdeý zaýytynda tyıym salynǵan "K-2" ekologııalyq klasty dızel otynyn óndirip, 50,6 myń tonna ónimdi zańsyz satyp, 11,3 mıllıard teńge paıda tapqany anyqtaldy. Onyń 22,6 myń tonnasy (6,7 mıllıard teńgege) shetelge kontrabandalyq jolmen shyǵarylǵan.
Zańsyz munaı aınalymynan túsken qarajat "Genesis" (nemese "Bolashaq sáýletshileri") atty zańsyz qoǵamdyq birlestiktiń qyzmetin qarjylandyrýǵa jumsalǵan. Ony quryp basqarǵany úshin 2023 jyldyń 21 tamyzynda Ábıev 7 jylǵa sottalǵan bolatyn.
Sot úkimi áli zańdy kúshine engen joq.
