Búgin, 4 naýryz Ordabasy aýdanyna qazaq ǵylymy men óndirisiniń órkendeýine ólsheýsiz úles qosqan, Jezqazǵan sırek metall óndirisiniń damýyna súbeli eńbegi sińgen, elge belgili tulǵa, Ulytaý oblysynyń jáne Jezqazǵan qalasynyń Qurmetti azamaty Tólegen Búkirov arnaıy issaparmen keldi.
Sapar barysynda Tólegen Nurmaǵanbetuly qazaqtyń aty ańyzǵa aınalǵan alyp kúsh ıesi Qajymuqan Muńaıtpasovtyń kesenesine zııarat etip, batyr babamyzdyń rýhyna quran baǵyshtady. Sondaı-aq, dańqty balýannyń ómiri men erlikterin dáripteıtin Temirlan aýylyndaǵy Qajymuqan atyndaǵy oblystyq sport murajaıyna at basyn burdy.
Tólegen Búkirovti Ordabasy aýdanynyń ákimi Azat Oralbaev pen Túrkistan oblystyq máslıhatynyń depýtaty Dýlat Ábish jyly qarsy alyp, qurmet kórsetti. Qonaqqa qazaqy dástúrmen shapan jaýyp, Ordabasy aýdanynyń 60 jyldyǵyna oraı jaryq kórgen «Ordabasy – kıeli meken» kitabyn jáne Qajymuqan Muńaıtpasovtyń músinin syıǵa tartty.
Bul kezdesýdiń máni tereńde. Tólegen Búkirov syndy elge eńbegi sińgen azamattardyń Qajymuqan baba rýhyna taǵzym etýi – ulttyq birligimiz ben tarıhı muramyzǵa degen qurmettiń aıqyn kórinisi. Mundaı ıgi bastamalar jas urpaqqa ónege bolyp, ult rýhanııatynyń órkendeýine óz úlesin qospaq.
