پرەمەر-ليگانىڭ 13-تۋرى اياسىندا وتكەن «ەلىماي» – «ورداباسى» ماتچىندا شۋ شىعارعاندارعا قاتىستى شەشىم قابىلداندى، دەپ حابارلايدى “ادىرنا” ۇلتتىق پورتالى.
14 ماۋسىم كۇنى سەمەي قالاسىندا “ەلىماي” مەن شىمكەنتتىك «ورداباسى» اراسىندا ويىن وتكەن.
الايدا ماتچ سوڭىندا داۋ شىعىپ، جۇرتتىڭ نازارىن اۋدارتقان.
شەشىمگە سايكەس، «ەلىماي» كلۋبىنىڭ باس باپكەرى اندرەي كارپوۆيچ ءتورت ماتچقا شەتتەتىلدى. ول تورەشى شەشىمىمەن كەلىسپەيتىنىن اگرەسسيۆتى تۇردە ءبىلدىرىپ، ويىن بارىسىندا ويىنشىلار، كلۋب وكىلدەرى جانە تورەشىلەر اراسىندا جانجال تۋىنداۋىنا سەبەپ بولعان.
سونىمەن قاتار «ەلىماي» ويىنشىسى جان الي پايرۋز دا ءتورت ماتچقا ديسكۆاليفيكاتسيالاندى. ول ورتالىق الاڭدا باس تورەشىگە فيزيكالىق قىسىم كورسەتۋ ارەكەتىن جاساعانى ءۇشىن جازالاندى.
كلۋبتىڭ باسقارۋشى ديرەكتورى فەدور سيمينيديگە ستاديوندارعا كىرۋگە تىيىم سالىندى. شەكتەۋ 2026 جىلدىڭ 1 قازانىنا دەيىن كۇشىندە بولادى. سونداي-اق وعان 100 اەك كولەمىندە ايىپپۇل سالىندى.
فەدەراتسيا دەرەگىنشە، سيمينيدي ماتچ كەزىندە جانە ودان كەيىن تورەشىلەرگە اگرەسسيا تانىتىپ، ەتيكالىق نورمالاردى بۇزعان.
«ەلىماي» كلۋبىنىڭ وزىنە دە بىرقاتار تارتىپتىك سانكتسيالار قولدانىلدى. جانكۇيەرلەردىڭ تورەشىگە بالاعات ءسوز ايتۋى، زات لاقتىرۋى جانە ءتارتىپ بۇزۋى ءۇشىن كلۋبقا جالپى 400 اەك كولەمىندە ايىپپۇل سالىندى.
سونىمەن بىرگە ماتچتىڭ باس تورەشىسى ارمان يسمۋراتوۆقا دا قاتىستى شەشىم قابىلداندى. ول ادەپسىز مىنەز-قۇلىق كورسەتكەنى ءۇشىن 2026 جىلدىڭ 1 قازانىنا دەيىن قىزمەتىنەن شەتتەتىلدى.
