ەكس-پرەزيدەنت نۇرسۇلتان نازارباەۆتىڭ ورتانشى قىزى دينارا قۇلىباەۆاعا تيەسىلى «قازاقستان-بريتان تەحنيكالىق ۋنيۆەسيتەتى» (قبتۋ) مەملەكەت مەنشىگىنە ءوتتى. بۇل تۋرالى قارجى ەسەپتىلىگى دەپوزيتاريىندە جازىلعان، دەپ حابارلايدى “ادىرنا” ۇلتتىق پورتالى.
Aقپاراتقا سايكەس، “قازاقستان-بريتان تەحنيكالىق ۋنيۆەرسيتەتى” اق-نىڭ 100% اكتسياسى قايتارىلعان اكتيۆتەردى باسقارۋ كومپانياسىنا بەرىلۋى ءتيىس. ال بۇل كومپانيا ءىرى بايلاردىڭ زاڭسىز يەلەنىپ، مەملەكەتكە قايتارعان دۇنيە-مۇلىكتى باسقارادى.
سونىمەن قاتار د.ۆ. سوكولسكي اتىنداعى ورگانيكالىق كاتاليز جانە ەلەكتروحيميا ينستيتۋتىنىڭ جانە ا.ب. بەكتۇروۆ اتىنداعى حيميا عىلىمدارى ينستيتۋتىنىڭ 100% اكتسيالارى دا مەملەكەت مەنشىگىنە وتەدى.
“قازىرگى ۋاقىتتا سوت ورىنداۋشىلارى بۇل شەشىمدى جۇزەگە اسىرۋ پروتسەسىن جۇرگىزۋدە”، دەلىنگەن حابارلامادا.
حابارلاماعا سايكەس، 27 اقپان كۇنى ءبىلىم ورداسىنىڭ اكتسيونەرلەرى اۋىسقان. قبتۋ-دىڭ اكتسيونەرلەرى قاتارىنان «نۇرسۇلتان نازارباەۆ ءبىلىم قورى» شىعىپ، ورنىنا «قايتارىلعان اكتيۆتەردى باسقارۋ كومپانياسى» ەنگەن.
ال «نۇرسۇلتان نازارباەۆ ءبىلىم قورىنا» دينارا قۇلىباەۆا، گالينا سامارسكايا جانە اسقار نۇرپەيىسوۆ يەلىك ەتەدى.
ايتا كەتەيىك، قبتۋ عيماراتى — الماتى قالاسىنداعى استانا الاڭىندا ورنالاسقان عيمارات. 1957 جىلى سالىنعان قالاداعى تاريحي جانە كورنەكتى عيماراتتاردىڭ ءبىرى.
بۇل عيماراتتا 1991 جىلى قازاقستان رەسپۋبليكاسىنىڭ تاۋەلسىزدىگى تۋرالى زاڭ قابىلداندى. 1997 جىلدان 2001 جىلعا دەيىن عيمارات الماتى وبلىسى اكىمىنىڭ رەزيدەنتسياسى قىزمەتىن اتقاردى. وسىدان كەيىن عيمارات قازاقستان-بريتان تەحنيكالىق ۋنيۆەرسيتەتى ورنالاسپاي تۇرىپ ءبىر جىلدان از ۋاقىت بوس تۇردى. 2018 جىلى قبتۋ باس زالى قايتا جاڭعىرتىلدى.
