ءماجىلىس دەپۋتاتى ەرمۇرات ءباپي نازارباەۆتىڭ وليگارحتارى حالىقتىڭ قارىزىن جاۋىپ بەرۋى كەرەك دەگەن مالىمدەمە جاسادى. ول بۇل ماسەلەنى حالىقتى نەسيەلەندىرۋگە ارنالعان پارلامەنتتىك تىڭداۋ بارىسىندا كوتەردى، دەپ حابارلايدى «ادىرنا» ءتىلشىسى.
«حالىقتىڭ قارىزىن ىزدەۋ ماسەلەسىنەن مىنا دۇنيەنى قوزعاعىم كەلەدى. پروكۋراتۋرا، سىزدەر ەسكى قازاقستاننىڭ حالىق الدىنداعى قارىزىن نەگە ىزدەمەيسىزدەر؟ ساۋىقتىرامىز دەپ ۇلتتىق قوردان بانكتەرگە بەرىلگەن تريلليونداعان تەڭگە قارىزدى قايتارۋدى نەگە تالاپ ەتپەيسىزدەر؟ سىزدەر حالىقتىڭ قارىزىن ەمەس، بىرنەشە بانكتى بىرىكتىرىپ، قىرۋار ساۋىقتىرۋ قارجىسىن ءبىر بانككە جيناستىرىپ، ونىڭ بارلىعىن سىپىرىپ الىپ كەتكەن نازارباەۆتىڭ وليگارحتارىنا تيەسىلى بانكتەردىڭ حالىققا بەرەشەك قارىزىن نەگە ءوندىرىپ المايسىزدار؟» - دەدى دەپۋتات.
ەرمۇرات ءباپي ەگەر وسى تريلليوندار قايتارىلسا، حالىقتىڭ قارىزىن ەكى-ءۇش، ءتىپتى ونداعان ەسە وتەۋگە بولاتىنىن اتاپ ءوتتى.
سونداي-اق دەپۋتات زاڭسىز شىعارىلعان اكتيۆتەردى ءوندىرىپ الۋ تۋرالى زاڭنىڭ قالاي ورىندالىپ جاتقانى تۋرالى ساۋال تاستادى.
باس پروكۋروردىڭ ورىنباسارى جاندوس ومىراليەۆ بۇل باعىتتا جۇمىس جۇرگىزىلىپ جاتقانىن اتاپ ءوتتى.
«بۇگىندە اۋقىمدى جۇمىستار جۇرگىزىلۋدە. ەلگە 900 ميلليارد تەڭگەگە جۋىق اكتيۆ قايتارىلدى. بۇل رەتتە اقشا عانا ەمەس، مۇلىك، جەر ۋچاسكەلەرى دە قايتارىلدى. رەگلامەنتتى ەسكەرە وتىرىپ، سىزبەن قوسىمشا كەزدەسۋگە جانە قاجەتتى اقپاراتتى بەرۋگە دايىنمىن»،—دەدى ول.
ۇقساس جاڭالىقتار
