موڭعولياداعى «شىڭعىس حان» ۇلتتىق مۋزەيىندە ۇلى حاننىڭ ورداسى اشىلىپ، ونىڭ اۋماعىنا حاننىڭ التىن ءمۇسىنى، اق تۋى جانە مەملەكەتتىك حاسبۋ ءمورى ورناتىلدى. بۇل تۋرالى 1 ناۋرىزدا موڭعوليالىق «مونتسامە» اگەنتتىگى جازدى، دەپ حابارلايدى «ادىرنا» ءتىلشىسى.
ءىس-شاراعا ەل پرەزيدەنتى تساحياگين حۋرەلسۋح، پارلامەنت توراعاسى داشزاگۆين امارباياسگالان، پرەمەر-مينيستر لۋۆساننامسرەين ويۋن-ەردەن، سونداي-اق ساياساتكەرلەر مەن قوعام قايراتكەرلەرى قاتىستى.
شىڭعىس حاننىڭ التىن ءمۇسىنىن جاساۋ مادەنيەت، سپورت، تۋريزم جانە جاستار ىستەرى مينيسترلىگى، موڭعوليانىڭ ورتالىق بانكى جانە ۇلتتىق مۇراجايمەن بىرلەسە وتىرىپ جۇزەگە اسىرىلعان. ۇزىندىعى 7 مەتر، ال سالماعى 120 كەلى ەسكەرتكىش تازا التىننان جاسالعان. ول شىڭعىس حاننىڭ ۇلى موڭعوليا مەملەكەتىن قۇرعانىن جاريالاپ، قولىنا التىن مەملەكەتتىك ءموردى ۇستاپ تۇرعان تاريحي ءساتىن بەينەلەيدى. ءمۇسىننىڭ اۆتورلىق قۇقىعى موڭعوليا ۇلتتىق بانكىنە تيەسىلى.
پرەزيدەنت حۋرەلسۋح ءوز سوزىندە شىڭعىس حاننىڭ موڭعولدار ءۇشىن عانا ەمەس، بۇكىل الەم ءۇشىن ماڭىزدى تۇلعا ەكەنىن اتاپ ءوتتى. مەملەكەت باسشىسى ءمۇسىندى جاساۋعا قاتىسقان جانە وسى جوبانى قولداعان بارلىق جانعا العىسىن ءبىلدىرىپ، تابىس تىلەدى.
