پارسى شىعاناعىنداعى يرانعا تيەسىلى حارك ارالىنىڭ باتىس تەرمينالى 25 كۇندىك تولىق توقتاۋدان كەيىن قايتا ىسكە قوسىلدى. بۇل تۋرالى Tasnim اگەنتتىگى جازدى، دەپ حابارلايدى «ادىرنا» ءتىلشىسى.
سپۋتنيكتىك سۋرەتتەر ۇزىندىعى شامامەن 333 مەتر بولاتىن VLCC ساناتىنداعى مۇناي تانكەرىنىڭ تەرمينالعا كەلىپ، شيكى مۇناي تيەۋگە كىرىسكەنىن كورسەتەدى. كەمە 11 شىلدەدەن بەرى كۇتۋ ايماعىندا زاكىردە تۇرعان. ەندى ول ايلاققا كەلىپ توقتاپ، شيكى مۇناي تيەۋ جۇمىستارىن باستاعان.
حارك ارالى – يراننىڭ مۇناي ەكسپورتىنداعى ستراتەگيالىق ماڭىزى اسا جوعارى نىسانداردىڭ ءبىرى. باق مالىمەتىنشە، ەلدىڭ مۇناي ەكسپورتىنىڭ شامامەن 90 پايىزى وسى ارالداعى تەرمينالدار ارقىلى جۇزەگە اسىرىلادى. تەرەڭ سۋداعى ايلاقتار الەمدەگى ەڭ ءىرى تانكەرلەردى قابىلداۋعا مۇمكىندىك بەرەدى.
اگەنتتىك سونداي-اق كەشم جانە لارك ارالدارى ماڭىندا جۇك كەمەلەرى مەن مۇناي تانكەرلەرىنىڭ قوزعالىسى كۇشەيگەنىن حابارلادى. سپۋتنيكتىك سۋرەتتەردە اتالعان اۋداندا 35 مۇناي تانكەرى مەن جۇك كەمەسى تىركەلگەن.
بۇدان بولەك، وڭىردە 36 جىلدام جۇرەتىن كاتەر بايقالعان. ساراپشىلاردىڭ پىكىرىنشە، ولار كەمەلەردى الىپ ءجۇرۋ نەمەسە پاترۋلدىك قىزمەت اتقارۋى مۇمكىن.
