الماتى وبلىستىق №1 بالالار ءۇيىنىڭ تاربيەلەنۋشىلەرى قوناەۆ قالاسىنا كوشىرىلمەيتىن بولدى. بۇل تۋرالى بۇگىن، 3 ناۋرىزدا بالا قۇقىقتارى جونىندەگى ۋاكىل دينارا زاكيەۆا مالىمەدى، دەپ حابارلايدى «ادىرنا» ءتىلشىسى.
ايتۋىنشا، بۇل شەشىم بالالار ءۇيىنىڭ تاربيەلەنۋشىلەرى مەن الماتى وبلىستىق اكىمدىگىمەن كەزدەسۋى ناتيجەسىندە شىعارىلعان.
«باعاناشىلداعى بالالار ۇيىندە تۇرىپ جاتقان بالالار سول جەردە قالاتىن بولدى. جاڭا عيمارات نۇسىپباەۆ اتىنداعى ينتەرناتتىڭ بالالارىنا بەرىلەدى. بۇعان دەيىن ول جاقتاعى تاربيەلەنۋشىلەرگە جاعداي جاسالماعانىن، بۇل ينتەرناتتاعى قيىندىقتار تۋرالى جازعان ەدىم»،—دەدى ول.
ەسكە سالايىق، بۇعان دەيىن №1 وبلىستىق بالالار ءۇيىنىڭ تاربيەلەنۋشىلەرى مەكەمە الماتىدان قوناەۆ قالاسىنا كوشىرىلىپ جاتقانىنا شاعىمدانعان بولاتىن. ولاردىڭ ۇندەۋى الەۋمەتتىك جەلىلەردە پايدا بولدى.
