ماڭعىستاۋ وبلىسىنىڭ مۇنايلى اۋدانىنا قاراستى باسقۇدىق اۋىلىندا ءبىر وتباسى تابيعي گازدان ۋلانىپ قايتىس بولدى، دەپ حابارلايدى “ادىرنا” ۇلتتىق پورتالى.
توتەنشە جاعداي 2 ناۋرىز كۇنى جەكە تۇرعىن ۇيدە بولعان. وقيعا ورنىنا جەدەل جەتكەن قۇتقارۋشىلار مەن مەديتسينا قىزمەتكەرلەرى بەسى كامەلەتكە تولماعان بالا بار جەتى ادامنىڭ دەنەسىن تاپتى.
الدىن الا مالىمەتتەرگە سايكەس، قايعىلى جاعداي گاز جابدىقتارىن دۇرىس پايدالانباۋ سالدارىنان ورىن العان. قازا بولعانداردىڭ بارلىعى قازاقستاندا ۋاقىتشا تۇرىپ جاتقان وزبەكستان ازاماتتارى ەكەنى انىقتالدى.
ورىن العان توتەنشە جاعدايدى زەرتتەۋ ءۇشىن مۇنايلى اۋدانىندا ارنايى كوميسسيا قۇرىلدى. كوميسسياعا ماڭعىستاۋ وبلىسى اكىمىنىڭ ءبىرىنشى ورىنباسارى ەربول ىزبەرگەنوۆ جەتەكشىلىك ەتەدى. سونىمەن قاتار، مارقۇمداردىڭ تۋىستارىنا جان-جاقتى كومەك كورسەتىلەتىنى حابارلاندى.
قايعىلى وقيعا ماڭعىستاۋ وبلىسى اكىمدىگىنىڭ جەكە باقىلاۋىنا الىندى.
