ۋكراينا پرەزيدەنتى ءوفيسىنىڭ باسشىسى اندرەي ەرماكتىڭ ۇيىندە ءتىنتۋ جۇرگىزىلگەنىن ەلدىڭ ەكى ءىرى انتيكوررۋپتسيالىق قۇرىلىمى — ۇلتتىق انتيكوررۋپتسيالىق بيۋرو (نابۋ) جانە ارنايى انتيكوررۋپتسيالىق پروكۋراتۋرا (ساپ) رەسمي تۇردە راستادى. تەرگەۋ ارەكەتتەرى ۋكراينادا «ەنەرگواتوم» مەملەكەتتىك كومپانياسىنا قاتىستى ءورشىپ تۇرعان ءىرى جەمقورلىق داۋىنىڭ اياسىندا ءوتىپ جاتىر. بۇل تۋرالى ۆۆس جازدى، دەپ حابارلايدى "ادىرنا".
انتيكوررۋپتسيالىق ۆەدومستۆولاردىڭ حابارلاماسىندا تىنتۋلەر زاڭمەن سانكتسيالانعانى جانە بەلگىلى ءبىر قىلمىستىق ءىس بويىنشا تەرگەۋ شەڭبەرىندە جۇرگىزىلىپ جاتقانى ايتىلدى. تولىق اقپارات كەيىنىرەك جاريالاناتىنى مالىمدەلدى.
اندرەي ەرماك تا بۇل اقپاراتتى راستاپ، ءوز Telegram-ارناسىندا مالىمدەمە جاسادى. ونىڭ ايتۋىنشا، تەرگەۋشىلەرگە پاتەرىنە تولىق قولجەتىمدىلىك بەرىلگەن، ال وقيعا ورنىندا ادۆوكاتتارى قۇقىق قورعاۋ ورگاندارىمەن جۇمىس ىستەپ جاتىر.
ء«وز تاراپىمنان تولىق ىنتىماقتاستىق تانىتىپ وتىرمىن»، — دەدى ول.
ۋكراينالىق مەديا — «ينتەرفاكس-ۋكراينا» جانە «ربك-ۋكراينا» انتيكوررۋپتسيالىق قۇرىلىمدارداعى دەرەككوزدەرگە سۇيەنە وتىرىپ، ازىرگە ەشبىر تۇلعاعا رەسمي تۇردە كۇدىك تۋرالى حابارلاما بەرىلمەگەنىن جازدى. تەرگەۋ جالعاسىپ جاتىر، بىراق قاي ءىستىڭ اياسىندا ءتىنتۋ جۇرگىزىلگەنى ناقتى ايتىلماعان.
العاش بولىپ ءتىنتۋ تۋرالى اقپاراتتى جوعارعى رادا دەپۋتاتى ياروسلاۆ جەلەزنياك جاريالاعان. «ۋكراينسكايا پراۆدا» باسىلىمى دا وقيعانى راستاپ، شامامەن 10 نابۋ جانە ساپ قىزمەتكەرىنىڭ ۇكىمەتتىك كۆارتال اۋماعىنا كىرگەنىن ءتۇسىرىپ العانىن جازدى.
ەسكە سالا كەتسەك، ەرماكقا قاتىستى تەرگەۋ ارەكەتتەرى ۋكراينادا «ەنەرگواتوم» كومپانياسىنا بايلانىستى جاريا بولعان ءىرى جەمقورلىق داۋىمەن تۇسپا-تۇس كەلىپ وتىر. تەرگەۋ ماتەريالدارىن، ونىڭ ىشىندە سويلەسۋلەر جازبالارىن نابۋ وسىعان دەيىن جاريالاعان بولاتىن.
