AQSh Kongresindegi Demokratııalyq partııa ókilderi prezıdent Donald Tramp pen onyń ákimshiliginiń Ýkraınaǵa qatysty saıasatyn synǵa aldy, dep habarlaıdy “Adyrna” ulttyq portaly.
Demokrattar kóshbasshysy Hakım Djeffrıs Tramptyń áreketterin “Amerıka úshin uıat jaǵdaı” dep atap, onyń ustanymy Reseı prezıdenti Vladımır Pýtınniń múddesine jumys isteıtinin aıtty.
“Prezıdent Zelenskıı men ýkraın halqy úsh jyl boıy demokratııa, bostandyq jáne shyndyq jolynda kúresip keledi. Olardyń jeńisi – AQSh-tyń ulttyq qaýipsizdigi úshin mańyzdy. Biz Ýkraınaǵa tolyqtaı qoldaý kórsetýimiz kerek”, – dedi Djeffrıs.
Senator-demokrat Djek Rıd te Aq úıdegi kezdesýdi “saıası qastandyq” jáne “Amerıka basshylyǵynyń masqarasy” dep baǵalady. Onyń aıtýynsha, Ýkraına men onyń halqy ómir súrý úshin kúresip jatyr, al Tramp pen onyń odaqtastary “Ýkraına men odaqtastarymyzdy kelemejdeýde”.
Senattaǵy demokrattar kóshbasshysy Chak Shýmer Tramptyń saıasatyn qatań aıyptap, ony “AQSh-ty ýltraońshyl avtorıtarlyq olıgarhııaǵa aınaldyrdy” dep málimdedi.
Senator Djınn Shahın de Tramptyń áreketteri AQSh-tyń halyqaralyq bedeline nuqsan keltiretinin aıtyp, “Prezıdent Ýkraına aldyndaǵy mindettemelerinen bas tartyp, Pýtınniń qandaı qanypezer dıktator ekenin túsinbeı otyr” dep synady.
Demokrattar Tramp pen vıe-prezıdent Djeı Dı Venstiń Ýkraına prezıdenti Vladımır Zelenskıımen kezdesýin synǵa alǵan basqa da málimdemeler jasady. Olar AQSh-tyń Ýkraınaǵa qoldaý kórsetýi álemdik turaqtylyq úshin mańyzdy ekenin alǵa tartty.
