اقش پرەزيدەنتى دونالد ترامپ اكىمشىلىگى بارلىق امەريكالىق ەلشىلىك پەن كونسۋلدىقتاردا ۆيزالىق سۇحباتتارعا جازىلۋدى ۋاقىتشا توقتاتتى، دەپ حابارلايدى «ادىرنا» ءتىلشىسى Reuters-كە سىلتەمە جاساپ.
اگەنتتىك مالىمەتىنشە، اقش مەملەكەتتىك دەپارتامەنتى كونسۋلدىق قىزمەتكەرلەرگە ارنالعان جاھاندىق وقىتۋ باعدارلاماسىن ىسكە قوسقان. باعدارلاما اياسىندا ماماندار ۆيزالىق ءوتىنىش بەرۋشىلەردى جان-جاقتى ءارى ءبىرىزدى باعالاۋعا جانە الەۋمەتتىك تولەمدەرگە تاۋەلدى بولۋى ىقتيمال تۇلعالاردى انىقتاۋعا ۇيرەتىلمەك.
يمميگراتسيالىق ۆيزاعا ءوتىنىش بەرگەن كەيبىر ازامات تاعايىندالعان سۇحباتتارىنىڭ كەيىنگە شەگەرىلگەنى تۋرالى حابارلاما العان. ۆيزالىق قابىلداۋلاردىڭ قاشان قايتا باستالاتىنى ازىرگە بەلگىسىز.
سونىمەن قاتار ترامپ اكىمشىلىگى B1/B2 ساناتىنداعى (تۋريستىك جانە ىسكەرلىك) 200 مىڭعا دەيىنگى ۆيزانى جاپپاي كەرى قايتارىپ الۋ ماسەلەسىن قاراستىرىپ جاتىر. اقش مەملەكەتتىك دەپارتامەنتىنىڭ وكىلى توممي پيگوتتىڭ ايتۋىنشا، بۇل شارا 2016–2026 جىلدارى اتالعان ۆيزالاردى الىپ، كەيىننەن اقش-تان باسپانا سۇراعان نەمەسە سۇراپ جاتقان شەتەل ازاماتتارىنا قاتىستى بولۋى مۇمكىن. ەگەر بۇل شەشىم جۇزەگە اسسا، ول اقش تاريحىنداعى ۆيزالاردى ەڭ اۋقىمدى ءبىر رەتتىك كەرى قايتارىپ الۋ وقيعالارىنىڭ بىرىنە اينالۋى ىقتيمال.
بۇعان دەيىن فەدەرالدىق سۋديا 75 ەل ازاماتىنا يمميگراتسيالىق ۆيزا بەرۋگە قويىلعان شەكتەۋدى زاڭسىز دەپ تانىپ، ونىڭ كۇشىن جويعان بولاتىن. سوت اكىمشىلىكتىڭ ءوز وكىلەتتىگىن اسىرا پايدالانعان دەگەن قورىتىندىعا كەلگەن.
