Qazaqstan bıligi Shveıarııada buǵattalǵan 212 mıllıon AQSh dollaryna qatysty shaǵymynan bas tartty. Osydan keıin Shveıarııanyń Federaldyq qylmystyq soty bul qarajatty sheshýge ruqsat berdi. Atalǵan soma sottalǵan kásipker Qaırat Boranbaevtyń jary Sholpan Boranbaevaǵa tıesili bolýy múmkin, dep habarlaıdy “Adyrna” ulttyq portaly «Vlast»-qa siltep.
2022 jyldyń maýsymynda Qazaqstan bıligi Shveıarııanyń Bas prokýratýrasyna Boranbaevtar otbasynyń shottary týraly aqparat suratyp, banktik qujattardy talap etken. 2023 jyldyń maýsymynda shveıarııalyq sot bul esepshottardy buǵattap, Qazaqstanǵa qujattardy jiberýdi maquldaǵan bolatyn.
Alaıda, keıinnen Qazaqstan bıligi birneshe ret resmı hat joldap, bul qarajattyń zańsyz jolmen kelgenine naqty dálel joq ekenin málimdedi. Osyǵan baılanysty Shveıarııa soty 2025 jyldyń qańtarynda esepshottarǵa qatysty barlyq shekteýlerdi alyp tastaý týraly sheshim shyǵardy.
2023 jyly Qaırat Boranbaev «QazTransGaz» kompanııasynan 14,5 mıllıard teńgeni jymqyrdy dep aıyptalyp, 6 jylǵa sottalǵan edi. Biraq ol shartty túrde merziminen buryn bosap shyǵyp, memleketke aktıvterin qaıtarýǵa kelisti.
2024 jyldyń mamyryna deıin ol jalpy quny 134,5 mıllıard teńgeni quraıtyn birneshe aktıvin qaıtardy.
2021 jyly Forbes jýrnaly Qaırat Boranbaevtyń baılyǵyn $590 mıllıon dep baǵalaǵan. Alaıda, 2022 jyldan bastap ol Forbes reıtıngterinen múldem túsip qaldy. Buǵan deıin Boranbaev «Qaırat» fýtbol klýbynyń negizgi ıesi bolǵany aıtylǵan edi.
