حالىقارالىق ايەلدەر كۇنى قارساڭىندا بقو، كازتالوۆ اۋدانىنداعى ساتىبالدى اۋىلىندا يگى باستاما جۇزەگە استى. اۋىلناي رۋسلان سارباەۆ 2026 جىلى دۇنيەگە كەلگەن بالاعا 200 مىڭ تەڭگە قارجىلاي سىياقى تابىس ەتتى. سالتاناتتى شاراعا اۋدان اكىمى اسلانبەك سارقۇلوۆ قاتىستى.
اۋدانىمىزدىڭ كوكتەرەك اۋىلدىق وكرۋگىنە قاراستى ساتىبالدى ەلدى مەكەنىندە 253 تۇرعىن بار. جىل باسىنان بەرى 4 بالا دۇنيە ەسىگىن اشقان. سالتاناتتى جيىندا جاس انالار نۇرلى قايىرعاليقىزى، گۇلدانا ادىلبەكقىزى، اياجان رۋسلانقىزى، اسەل بەيبىتقىزىنا سەرتيفيكات تابىستالدى. اۋدان اكىمى اسلانبەك احمەتوللاۇلى جاس وتباسىلاردى قۇتتىقتاپ، رۋسلان ساميعوللاۇلىنا ريزاشىلىعىن ءبىلدىردى.
— قازاق حالقى انانى ءاردايىم ەرەكشە قۇرمەتتەگەن. بۇگىنگى شارا دا سول قادىرلى انالارعا، جاس وتباسىلارعا دەگەن شىنايى قۇرمەت پەن جاناشىرلىقتىڭ جارقىن كورىنىسى دەۋگە بولادى. ساتىبالدى اۋىلىنىڭ اۋىلنايى، ەل جاناشىرى رۋسلان ساميعوللاۇلى سارباەۆتىڭ باستاماسىمەن 2026 جىلى دۇنيەگە كەلگەن سابيلەرى بار 4 وتباسىعا 200 مىڭ تەڭگە كولەمىندە قارجىلاي قولداۋ كورسەتىلىپ وتىر. بۇل جاڭا ومىرگە كەلگەن سابيلەرگە دەگەن اق تىلەكتىڭ، انالارعا دەگەن قۇرمەتتىڭ، اۋىل بولاشاعىنا دەگەن سەنىمنىڭ بەلگىسى. مەملەكەت باسشىسى قاسىم-جومارت كەمەلۇلى توقاەۆ: «تابىسقا جەتكەن ءاربىر كاسىپكەر ءوز اۋىل-ايماعىنىڭ وركەندەۋىنە ۇلەس قوسىپ، قارجى سالسا، ەلىمىزدەگى كوپتەگەن ەلدى مەكەن كوركەيە تۇسەرى انىق» دەپ اتاپ وتكەن بولاتىن. بۇگىنگى يگى ءىسى وسى ءسوزدىڭ ومىرشەڭدىگىن دالەلدەيتىن ناقتى قادام، — دەدى اۋدان اكىمى.
بيىل ساتىبالدى اۋىلىندا 10 وتباسى ءسابيلى بولادى دەپ كۇتىلۋدە. اۋىلنايدىڭ بۇل باستاماسىن اۋىل تۇرعىندارى دا جىلى قابىلداپ، جاس وتباسىلارعا قولداۋ كورسەتكەن ازاماتتارعا العىستارىن ءبىلدىردى.
— اۋىلىمىزدىڭ جاناشىرى رۋسلان اعامىزدىڭ بۇل باستاماسى جاس وتباسىلارعا ۇلكەن دەمەۋ بولدى. «بەرسەڭ بالاعا بەر» دەيدى حالقىمىز. ءبىز مۇنى بالامىزدىڭ نەسىبەسى دەپ بىلەمىز. حالىقارالىق ايەلدەر كۇنى قارساڭىندا وسىنداي قۋانىشتى ءساتتىڭ كۋاسى بولۋ ەرەكشە اسەر سىيلادى. سونىمەن قاتار ەلىمىزدە حالىقتىڭ ءال-اۋقاتىن ارتتىرۋعا باعىتتالعان ماڭىزدى رەفورمالار جۇزەگە اسىرىلىپ كەلەدى. سونىڭ ىشىندە كونستيتۋتسيالىق رەفورمانىڭ ماڭىزى زور. سوندىقتان الداعى رەفەرەندۋمعا قاتىسىپ، ءوز تاڭداۋىمدى جاساۋعا نيەتتىمىن، — دەدى نۇرلى قايىرعاليقىزى ەلدەگى ساياسي وزگەرىستەر جايىندا پىكىرىمەن ءبولىستى.
ايتا كەتەيىك، ساتىبالدى ەلدى مەكەنىنە «قالادان – اۋىلعا» باعدارلاماسى اياسىندا 2024 جىلى 1 وتباسى، 2025 جىلى تاعى 1 وتباسى كوشىپ كەلگەن. الداعى ۋاقىتتا تاعى ءبىر وتباسىنىڭ قونىس اۋدارۋى جوسپارلانىپ وتىر.
