تۇركيادا تۇرمەدە وتىرعان كۇردىستان جۇمىسشىلار پارتياسىنىڭ (PKK) جەتەكشىسى ابدۋللا ودجالان ۇيىم مۇشەلەرىن قارۋلارىن تاستاۋعا شاقىردى. ونىڭ تاريحي مالىمدەمەسى پروكۋردتىق ساياساتكەرلەر ارقىلى جاريالاندى، دەپ حابارلايدى “ادىرنا” ۇلتتىق پورتالى Middle East Eye-عا سىلتەپ.
ودجالان ءوزىنىڭ جازباشا مالىمدەمەسىندە PKK-نىڭ قارۋلى كۇرەسى بۇرىن كۇرد حالقىنىڭ قۇقىقتارى مەن ەركىندىكتەرىن شەكتەيتىن ساياساتقا قارسى قاجەتتى قادام بولعانىن ايتتى. الايدا، ونىڭ ايتۋىنشا، تۇركيا ۇكىمەتى قابىلداعان دەموكراتيالىق شارالار مەن ايماقتاعى وزگەرىستەر بۇل كۇرەستىڭ ەندى ماعىناسىز ەكەنىن كورسەتەدى.
“بارلىق توپتار قارۋىن تاستاپ، PKK تاراۋى كەرەك. مەن قارۋلى كۇرەستى توقتاتۋعا شاقىرامىن جانە وسى ۇندەۋ ءۇشىن تاريحي جاۋاپكەرشىلىكتى ءوز موينىما الامىن” – دەدى ودجالان. ول PKK-نىڭ تاراتىلۋى تۋرالى شەشىم قابىلداۋ ءۇشىن ارنايى كونگرەسس شاقىرۋدى ۇسىندى.
بۇل مالىمدەمە ودجالانمەن كەزدەسۋ وتكىزگەن پروكۋردتىق پارتيا حالىقتىق تەڭدىگى جانە دەموكراتياسى (DEM) دەلەگاتسياسى ارقىلى جاريالاندى. ساراپشىلاردىڭ پىكىرىنشە، بۇل قادام 40 جىلدان استام ۋاقىتقا سوزىلعان قاقتىعىستى توقتاتۋعا جانە 5000-عا جۋىق PKK سودىرىن قارۋسىزداندىرۋعا ىقپال ەتۋى مۇمكىن.
تۇركيا، ەۋروپالىق وداق جانە اقش PKK-نى تەرروريستىك ۇيىم دەپ سانايدى. ودجالان مەن تۇركيا ۇكىمەتى اراسىنداعى كەلىسسوزدەر وتكەن جىلى باستالعان. ۇلتتىق قوزعالىس پارتياسىنىڭ (MHP) جەتەكشىسى دەۆلەت باحچەلي ودجالانعا تۇركيا پارلامەنتىندە ءسوز سويلەۋگە مۇمكىندىك بەرۋدى ۇسىنعان بولاتىن.
ودجالاننىڭ جاقىن ارادا يراكتىڭ سولتۇستىگىندەگى PKK كۇشتەرىن قارۋدى تاستاۋعا شاقىرۋى كۇتىلۋدە. بۇل قادام ۇيىمدى تاراتۋعا باعىتتالعان العاشقى ناقتى قادام بولماق.
