Túrkııada túrmede otyrǵan Kúrdistan jumysshylar partııasynyń (PKK) jetekshisi Abdýlla Odjalan uıym múshelerin qarýlaryn tastaýǵa shaqyrdy. Onyń tarıhı málimdemesi prokýrdtyq saıasatkerler arqyly jarııalandy, dep habarlaıdy “Adyrna” ulttyq portaly Middle East Eye-ǵa siltep.
Odjalan óziniń jazbasha málimdemesinde PKK-nyń qarýly kúresi buryn kúrd halqynyń quqyqtary men erkindikterin shekteıtin saıasatqa qarsy qajetti qadam bolǵanyn aıtty. Alaıda, onyń aıtýynsha, Túrkııa úkimeti qabyldaǵan demokratııalyq sharalar men aımaqtaǵy ózgerister bul kúrestiń endi maǵynasyz ekenin kórsetedi.
“Barlyq toptar qarýyn tastap, PKK taraýy kerek. Men qarýly kúresti toqtatýǵa shaqyramyn jáne osy úndeý úshin tarıhı jaýapkershilikti óz moınyma alamyn” – dedi Odjalan. Ol PKK-nyń taratylýy týraly sheshim qabyldaý úshin arnaıy kongress shaqyrýdy usyndy.
Bul málimdeme Odjalanmen kezdesý ótkizgen prokýrdtyq Partııa halyqtyq teńdigi jáne demokratııasy (DEM) delegaııasy arqyly jarııalandy. Sarapshylardyń pikirinshe, bul qadam 40 jyldan astam ýaqytqa sozylǵan qaqtyǵysty toqtatýǵa jáne 5000-ǵa jýyq PKK sodyryn qarýsyzdandyrýǵa yqpal etýi múmkin.
Túrkııa, Eýropalyq Odaq jáne AQSh PKK-ny terrorıstik uıym dep sanaıdy. Odjalan men Túrkııa úkimeti arasyndaǵy kelissózder ótken jyly bastalǵan. Ulttyq qozǵalys partııasynyń (MHP) jetekshisi Devlet Bahchelı Odjalanǵa Túrkııa parlamentinde sóz sóıleýge múmkindik berýdi usynǵan bolatyn.
Odjalannyń jaqyn arada Iraktyń soltústigindegi PKK kúshterin qarýdy tastaýǵa shaqyrýy kútilýde. Bul qadam uıymdy taratýǵa baǵyttalǵan alǵashqy naqty qadam bolmaq.
