Almatyda belgili kásipker, ekolog, ınnovaııalyq patentterdiń avtory Oljas Dúısen qamaýǵa alyndy. Buǵan deıin ol zańsyz qysym kórip jatqanyn aıtyp, áleýmettik jelide málimdeme jasaǵan bolatyn, dep habarlaıdy "Adyrna" ulttyq portaly.
"Qazirgi ýaqytta meni tergeý ızolıatoryna alyp ketýge keldi. Biz taǵylǵan aıyptardyń negizsiz ekenin dáleldeıtin barlyq aıǵaqtardy usyndyq. Alaıda, prokýratýra bul dálelderdi qabyldamaı otyr. Bul – zańsyzdyq. Eger mundaı jaǵdaı jalǵasa berse, erteń kez kelgen adam osyndaı qysymǵa ushyraýy múmkin", – dedi Oljas Dúısen áleýmettik jelidegi sońǵy jazbasynda.
Kásipkerdiń aıtýynsha, ol KazEcoSolutions seriktestiginiń burynǵy seriktesi Erjanovtyń aryzy boıynsha qylmystyq iske tartylǵan. Alǵashynda oǵan qarjy jymqyrý aıyby taǵylsa, keıin bul aıyptaýlardy joqqa shyǵaratyn qujattar usynylǵan soń, prokýratýra reıderlik jasady degen jańa is qozǵaǵan.
Oljas Dúısen bul istiń artynda belgili bir tulǵalardyń múddesi baryn aıtyp, quqyq qorǵaý organdary olardyń tapsyrysyn oryndap otyr dep sanaıdy. Sonymen qatar, bul birinshi ret jasalǵan qysym emes ekenin eskertti. Ol 2024 jyldyń qarashasynda Bakýdegi klımattyq mıtıngke qatysyp júrgen kezde ózine repressııa jasalýy múmkin ekenin boljaǵanyn aıtty.
Ekologtyń sózinshe, bul janjal 2008 jyldan beri jalǵasyp keledi. Ol seriktesterimen birge KazEcoSolutions kompanııasyn quryp, topyraqty tazartý jáne qaldyqtardy óńdeýmen aınalysa bastaǵan. Keıin birneshe kelisim nátıjesinde kompanııanyń jalǵyz ıesi atanǵan. Alaıda, onyń burynǵy seriktesi Erjanov bul mámilelerdi zańsyz dep tanymaq bolǵan.
Táýelsiz aýdıt nátıjesinde, kerisinshe, Erjanovtyń ózi 23 mıllıon teńge qarjy jymqyrǵany anyqtalǵan. Ekolog ári kásipker óziniń taǵylǵan aıyptar oıdan qurastyrylǵanyn aıtyp, ádildik talap etip otyr.
