ۋكراينا ۇكىمەتى اقش-پەن ينۆەستيتسيالىق قور قۇرۋ جونىندەگى كەلىسىمدى بەكىتۋ ءۇشىن قاجەتتى شەشىمدەر قابىلداۋدا. بۇل تۋرالى ەلدىڭ پرەمەر-ءمينيسترى دەنيس شمىگال مالىمدەدى، دەپ حابارلايدى "ادىرنا" ۇلتتىق پورتالى.
كەلىسىم اياسىندا ۋكرايناعا تابيعي رەسۋرستارىن، سونىڭ ىشىندە سيرەك كەزدەسەتىن مەتالداردى يگەرۋدە جاڭا مۇمكىندىكتەر اشىلماق. شمىگالدىڭ ايتۋىنشا، قور ۋكراينا مەن اقش-تىڭ بىرلەسكەن مەنشىگى بولادى جانە ونى ەكى ەلدىڭ ۇكىمەتتەرى بىرلەسىپ باسقارادى.
"ۋكراينانىڭ جەر قويناۋى مەن رەسۋرستارى ءوز مەنشىگىندە قالادى، ولار اقش-قا نەمەسە باسقا بىرەۋگە بەرىلمەيدى. ۋكراينا بولاشاقتا ءوزىنىڭ تابيعي رەسۋرستارىنان تۇسەتىن تابىستىڭ 50%-ىن قورعا اۋدارماق، ال اقش قارجى قۇرالدارى مەن باسقا دا قاجەتتى اكتيۆتەر ارقىلى ۇلەس قوسادى" – دەپ ءتۇسىندىردى شمىگال.
قورعا جينالعان قاراجات ۋكراينا ەكونوميكاسىن قالپىنا كەلتىرۋگە باعىتتالاتىنى جانە بۇل كەلىسىمنىڭ ۋكراينا ەو-عا ينتەگراتسيالاۋ مىندەتتەمەلەرىنە سايكەس كەلەتىنى اتاپ ءوتىلدى.
بۇعان دەيىن 21 اقپاندا ۇسىنىلعان كەلىسىمنىڭ العاشقى نۇسقاسىندا اقش ۋكراينا تابيعي رەسۋرستاردان، مۇناي-گاز سەكتورىنان جانە پورتتىق ينفراقۇرىلىمنان تۇسەتىن تابىستىڭ 50%-ىنان باس تارتۋىن تالاپ ەتكەن بولاتىن. سونىمەن قاتار، اقش-تىڭ كەلىسىمگە سايكەس 500 ميلليارد دوللارلىق قور قۇرۋدى تالاپ ەتكەنى تۋرالى اقپارات تاراعان.
الايدا، ۋكراينا پرەزيدەنتى ۆلاديمير زەلەنسكي بۇل تالاپتاردى قابىلداۋدان باس تارتتى.
سوڭعى مالىمەتتەرگە سايكەس، اقش پرەزيدەنتى دونالد ترامپ 28 اقپاندا زەلەنسكيدى اق ۇيدە كۇتىپ، سيرەك كەزدەسەتىن مەتالدار بويىنشا مامىلەگە قول قويۋى مۇمكىن.
