مەكسيكا پرەزيدەنتى كلاۋديا شەينباۋم دونالد ترامپتىڭ مەكسيكا شىعاناعىنىڭ اتاۋىن وزگەرتۋ تۋرالى مالىمدەمەسىنە جاۋاپ رەتىندە اقش-قا XVII عاسىرداعى تاريحي اتاۋىن قايتارۋدى ۇسىندى، دەپ حابارلايدى "ادىرنا" ۇلتتىق پورتالى NBC News-كە سىلتەپ.
اقش-تىڭ بۇرىنعى پرەزيدەنتى دونالد ترامپ سەيسەنبىدە مەكسيكا شىعاناعىنىڭ اتاۋىن «امەريكا شىعاناعى» دەپ وزگەرتۋ تۋرالى وي قوزعاعان بولاتىن.
كلاۋديا شەينباۋم بۇل پىكىرگە جاۋاپ رەتىندە 1607 جىلى امستەردامدا جاسالعان ەۋروپالىق كارتانى كورسەتتى. بۇل كارتادا اقش اۋماعى «America Mexicana» دەپ اتالعان. پرەزيدەنتتىڭ ايتۋىنشا، بۇل اتاۋ ايماقتىڭ تاريحي مۇراسىن بەينەلەيدى جانە سيمۆوليكالىق مانگە يە.
"نەگە ءبىز «America Mexicana» دەپ اتاماسقا؟ بۇل تاريحي دالدىككە ساي كەلەدى جانە تاماشا ەستىلەدى", – دەدى شەينباۋم.
پرەزيدەنت سونداي-اق دونالد ترامپتىڭ مەكسيكانى ەسىرتكى كارتەلدەرى باسقارادى دەگەن مالىمدەمەسىن جوققا شىعاردى.
"مەكسيكانى حالىق باسقارادى", – دەدى ول.
ايتا كەتەيىك، «America Mexicana» اتاۋى 1814 جىلى قابىلدانعان اپاتسينگان كونستيتۋتسياسىندا دا قولدانىلعان. بۇل قۇجات يسپان بيلىگىنە قارسى مەكسيكالىقتاردىڭ تاۋەلسىزدىك ءۇشىن كۇرەسىن بەينەلەيدى.
