اقش پرەزيدەنتى دونالد ترامپ ۋكراينانىڭ رەسەي اۋماعى تۇكپىرىنە اقش زىمىراندارىمەن سوققى جاساۋىنا قارسى ەكەنىن ايتتى. بۇل تۋرالى ول 12 جەلتوقسان، بەيسەنبىدە جاريالانعان Time جۋرنالىنا باسىلىمنىڭ نۇسقاسى بويىنشا «جىل ادامى» دەپ تانىلۋىنا بايلانىستى بەرگەن سۇحباتىندا مالىمدەدى، جەپ حابارلايدى “ادىرنا” ۇلتتىق پورتالى.
«مەن رەسەيگە جۇزدەگەن ميل تەرەڭدىككە زىمىراندار ۇشىرۋعا ءۇزىلدى-كەسىلدى قارسى ەكەنىمدى ايتامىن. نەگە ءبىز بۇنى جاساپ جاتىرمىز؟ ءبىز تەك بۇل سوعىستى قوزدىرىپ، جاعدايدى اۋىرلاتامىز»، – دەپ كەلتىرەدى باسىلىم ترامپتىڭ سوزدەرىن.
“ۋكرايناعا قولداۋ كورسەتۋدى توقتاتا ما” دەگەن سۇراققا سايلانعان پرەزيدەنت اقش كومەگىن رەسەيمەن اتىستى توقتاتۋ تۋرالى كەلىسسوزدەردە قىسىم جاساۋ قۇرالى رەتىندە پايدالاناتىنىن ايتتى.
«مەن كەلىسىمگە قول جەتكىزگىم كەلەدى، ال مۇنىڭ جالعىز جولى – كيїۆتى قولداۋدان باس تارتپاۋ»، – دەدى ول.
سايلاۋالدى ناۋقانى كەزىندە ترامپ رەسەي مەن ۋكراينا اراسىنداعى سوعىستى «24 ساعاتتا اياقتاۋعا» ۋادە بەرگەن ەدى. الايدا جۋرناليستەرمەن اڭگىمەسىندە ساياساتكەر بەيبىتشىلىك ورناتۋ وڭاي بولمايتىنىن مويىندادى.
«تاياۋ شىعىستاعى ماسەلەلەردى شەشۋ الدەقايدا وڭاي، ال رەسەي مەن ۋكراينا اراسىنداعى جاعداي الدەقايدا كۇردەلى. جاستاردىڭ مايىتتەرىنىڭ دالالارعا شاشىلىپ جاتقانىن كورۋ تاڭعالدىرادى. بۇل – اقىلعا سىيمايتىن نارسە»، – دەپ اتاپ ءوتتى ترامپ.
قاراشا ايىنىڭ ورتاسىندا اقش بيلىگى ۋكرايناعا ATACMS بالليستيكالىق زىمىراندارىن رەسەي اۋماعىنا سوققى جاساۋعا رۇقسات بەرگەنى بەلگىلى بولدى. 11 جەلتوقساندا رەسەي قورعانىس مينيسترلىگى تاگانروگتاعى اسكەري اەرودرومعا ATACMS زىمىراندارىمەن سوققى جاسالعانىن مويىندادى.
